Zugfahrt + Irkutsk

saletti allersits,
so as gaebt wieder soooooooo... viel zverzela, i beschraenk mi jetzt mol ufs wesentlicha!
well ues jo Perm so guat gfalla haet und zu allem ana no schlecht Wetter bi 5 Grad (!!!) gsi isch am 21.05. haemmer gfunda miar koenntend jo ufem Bahnhof warta. As sind nu ca. 7 Stund gsi wommer haend muessa uf da Zug warta. as isch daenn schnell relativ luschtig worda. Wommer d Jasskarta uspackt haend isch irgend an Russ zu ues ghockt (glaub an "penner") und haet wela mitspiela. er haet ues glaub fascht 6 stund uf russisch vollquaslet und zwueschet dura mol uf English gfrogt "everybody good?". isch aber au zeinziga gsi wonner English haet koenna...
Das do una ischer also. Dr Michi haet gfunda, das Bild mueass in da Blog (na ja ;-) )!
As isch daenn also relativ schnell 8i worda und dr Zug isch endlich ko. miar haend au das mol as Abteil ganz fuer ues gha. As isch zwor ganz as biz eng gsi aber gmueatlich. Dr Rescht vom Waga isch voll gsi mit Duetscha.
Waehrend daera ca. 60 Stuendiga Etappa, fahrt ma an jenschta so Holzhuetadoerfli verbie. Relativ viel zerkeiti Huettana und Industrie gseht ma au.
Was aber hingega schoen isch, sind di viela Waelder, und extrema Witena, woma kai Hus oder suss oepis gseht.

Am Sunntig Morga simmer daenn in Irkutsk ako, bi ebafalls 5 Grad. Miar sind daenn mol in zHostel und nochhaer ind Stadt. Nochem Mittag haet d Sunna agfanga broetla und as isch zwuescha 20 und 25 Grad warm worda.
So dr erscht Idruck vo Irkutsk isch mol einiges besser als vo Perm. Gseht so richtig noch gmueatlicher Kleinstadt us. Das Bildli una isch an dr Hauptstross. Haet an huffa Laedali aber extrem wenig Kafis und Restaurants.

Waema sich daenn mol zwei, drei Sitastrossa witer waeg bewegt gsehts daenn aber schnell mol so us. As haet no u viel Holzhuettana in dr Stadt und dStrossa sind katrastrophal. Aber so wias usgseht ischs nid extrem gfoehrlich do.

Jetzt wieder mol zwei Sacha ueber d Russa:

1. Dia Koega sufend gar nid viel Vodka, dafuer jede Menge Biar!!!

2. Russischi Arbeitsmoral (Bahn- und Bauarbeiter), eina bis maximal zwei schaffend abiz und so zwuescha fuef und acht luagend zua, sitzend uma oder rauchend. Hans also echt no nianed anderscht gseh!!!

Guat das waers daenn wieder mol gsi vo uesera Sitta.
In da noegschta 7 bis 10 Tag werdender vo ues nued me ghoera. Morn Morga am 8i goemmer ufd Insla Olchon go Zelta. Das heisst nix Strom...

Bis daenn und a Grueassli

Perm zum letzten

Hallo,
so das wird di letscht meldig us Perm.
Miar hends geschter nomol am Bahnhof probiart mit Witerfahrt probiara. Miar händ sogar a übersetzigsschriba vor Kate dabi gha. Hät alles nüd gnüzt gha, sogar as Telefon vor Schalterdama an da Direktor nid. Si händ dänn gmaint as Dütsches Tiket woma mir Kreditkarta zahlt heg könn ma nid verschiaba...!
Na ja, halb so wild. Miar händs mol glich immer luschtig gha do.
Geschter hämmer z.B. ufam Fenschterbrett im Hotelzimmer dr Kocher ufgstellt und Pasta kocht (hmmm... fain gsi wia bim Italiener). Oder hüt simmer 2 Stund and Kama go "Häggi Sägg" spiela.
Und viiiiiiiiiieeeeeeeeel usgschlofa hämmer au. Miar sind jetzt also voll grüschtet für di nögscht etappa:
Abfahrt: 21.05.09, 22:14 (für eu 18:14) ab uf Irkutsk.
Ankunft: 24.05.09, 09:07 (für eu 02:07)
Abam Sunntig simmer eu dänn also 7 Stund vorus!
Jo miar freuend üs ufd Zugfahrt und sind gspannt was mr no als erläbend bis am Sunntig!
Bis früanschtens am Sunntig...

3. Tag Perm

Miar sind mitlerwila dr dritt Tag in Perm. Dr erschta Idruck het sich echt bestaetigt, as isch as verschlofnigs Grossstaedtli.
Aber isch OK. Miar sind amol abiz uma gloffa und haend ues as Bild koenna macha vor Stadt. Vonera junga Frau (Kate) wo ues au no gholffa haet haemmer erfahra, das Perm bis vor ca. 15 Johr a gsperrti Stadt gsi isch wo Kriegsmaterial hergstellt haet. Drum haets do kai Sehenswuerdigkeita und so.
Ufem 1. Bild isch eini vo da Hauptverkehrsachsana vo Perm.
Uebrigens, dia haend so schlechti Strossa, dasma vo Perm uf Moskau (1350 km) ca. 3 Tag haet mitem Auto!
Uf dem Bild gsehnder an Industriekran an dr Kama (Fluss durch Perm). Vo dena Kraen haets an daem Ufer a ganzi schwetti.

Nomol zur Kate zruck. Am Fritig Nomittag haemmer an dr Zimmertuer im Hotel a Zettel gha. As isch a Nochricht vor Kate gsi, vo waega si seg dia wo ues am Obig gholfa heg an dr Reception. Si haet ues iri Tel.-Nummera und d Mailadressa gae, waemmer Hilf bruchendi koennemer ues melda (huara liab!!!). Am Samstig haemmer daenn vo daem gebruch gmacht. Si isch mit ues uf da Bahnhof (wo wieder niamert Englisch haet koenna...) und haet versuacht d Reservation noch Irkutsk vorzverschiaba. As isch nid direkt ganga, well d Zueg usbuacht sind, jetzt goemmer am Di. allai nomol.

Geschter simmer daenn mit zwei Oestrichischa Uslandmontoera im Usgang gsi. D Bars do sind jo OK aber suss haets aswia nur so Snop-Clubs, dia haend ues (wen wunderts) nid ina lo. Schlussentlich ischs daenn glich 4i am Morga gsi, bis mr im Bett gsi sind.

Huet haemmer an krassa Waetter wechsel gha. As kunnt jetzt a kueals Uralgebirge-Lueftli und as isch Bedekt bi grad amol no 5 Grad. Geschter isch no 20 Grad warm gsi.

Suss gots ues super und miar koemend ues immer guat aswia zvertwila.
Bis bald...

1. Tag Perm

Hallo,
sodali, jetzt simmer also in Perm...
Uf da Photos sind as paar impressiona vor Zugfahrt.
Z erschta Bild isch no in Moskau ufem Bahnhof, wo alli wia wild umaspringend und extrem viel Gepaeck und Esswara umaschleppend.

Do ufem zweita Bild gsehnder amol as Abteil ima Transsibirischa Zug. Miar haend grad as ganzes vierer Abteil nu fuer ues gha. So haemmer mit uesna klina Rucksaeck grad gnuag Platz gha.

Uf dr Fahrt uf Perm gseht ma vor allem gmischti Birka und Fichta Waelder und immer wieder so halb vergheiti Holzdoerfli. Ab und zua gseht ma wieder amol ueber witi Aecker oder irgendwelchi Fluess.

Vo Perm koemend daenn no Photana.

So und wommer in Perm ako sind simmer amol a guenstigs Hotel go suacha, dos in Perm kei Hostels git. Ufem Bahnhof haend ues zwei agsprocha, ob miar Bagpackers segend (als ob ma das nid gseh wuer...). Si haend ues daenn kli dies und das verzellt und sind mit ues ind City gfahra (mim Tram). Si sind daenn witer und miar in a Hotel.

Und jetzt fangt amol a Story a, wo nid alles rund gloffa isch:

An dr Reception frogt ues di netti Lady wo kum Englisch kann, ob mr dRegistration vo Moskau hegend. Daenn haemmer ues agluagt und muessa saega "shit, voll vergessa".

Zerscht haends ues wella weg schicka aber noch langa Gsproech und nochdem ues no eini gholffa heat koemmer jetzt glich blieba. Mol luaga wia das no witer got...

Jetzt luegemer ues mol uma aber es gseht extrem noch Provinzstaedtli mit 1.3 Milliona Iwohner us.
Miar machend sicher zbeschta drus!!!;-)

Tag 4 in Moskau

Dr zweitletsschti Tag in Moskau isch au scho bald wieder verbie. Nochera witera luschtiga Nacht im Papa's Place (ein MUSS für jeda wo mol in Moskau isch...) simmer wieder eher biz spot und licht beduslet im Hostel ako. So gega Mittag simmer dänn ufgstanda und händ amol üsi stinkenda Kleider gwäscha. Z'Zimmer isch jetzt mit da Kleider tapeziart. Miar hoffend mol as tröchnet alles bis morn Nomittag.
Am Mittag simmer ufgstanda bi stralendem Sunnaschii und scho wieder 25 Grad. As hät sich dänn aber um di 3 schlagartig gänderet und jetzt hämmer halt kli Rägawetter. I finds super, isch nämlich in sonera Megacity einiges agnehmer bi jetzt no 15 Grad.
Miar händ dänn nochem erschta Gwitterli doch no an klina Usflug gwogt durd Stadt. Miar sind vom Hostel us in di alti Ikaufs- und Kaffimeila "Stary Arbat". An dera Stross häts dänn au grad no z'Moskauer Hard Rock Cafe gha, hämmer grad schnell müassa ana Biarli.;-)
D'Fotana sind as paar Idrück vo hüt.

D'Turi-Zona "Stary Arbat"

Moskauer Obig Verkehr uf so 4 - 6 Spura pro Strossasita

An sehr speziella Kontrast, alta Wohnblock und a Kirchli oder Moscheeli oder so...

Sodali, das wärs für hüt wieder gsi. Morn am 21:25 fahrt dänn üsera Zug noch Perm. Das sind dänn 1434 Kilometerli und witeri 2 Zitzonena Ostwärts.

PS: wänns irgend öperem agnehmer wär, wenn miar üsi Bricht uf Schriftdütsch verfassa würend söllers doch bitte säga.

Kreml

Hüt machemmers mol kurz.
Miar sind üs hüt Mittag kli um und im Keml d'Bei go vertrampa...


Das isch dr Blick über dr roti Platz zum historischa Museum.



D'Basilius-Kathedrala, glauba dia verbindet jeda mit Moskau.

Vor andera Sita.

Das isch im Kreml. Dia Glogga woma gseht isch 210 Tonna schwär und hät an Durchmesser vo lächerlicha 6.6 Meter!!!

Das isch so an Standart-Blick in dr Moskauer Innastadt.

So miar hoffend, dasmer a paar gwunderigi unter eu für da Moment hend könna besänftiga. :-)

Bis bald...

Moskau

Soli,

dia erscht Moskauer Usgangsnacht haemmer sehr guat ueberstanda. Miar haend an super Tip griagt zum in Usgang go. Nochema guata Znacht simmer no in da Club. Isch echt luschtig gsi und nochema 3/4 Stund Heimarsch simmer daenn am 04.15 mol im Hostel gsi. Us daem Grund isch huet erscht am 14.00 Tagwacht gsi. ;-)

Und jetzt mol zu ueserna erschta Idrueck vo Moskau.

1. As isch in dera Stadt erstundlich suber.

2. D'Luet sind sehr fruendlich, sogar wenns keis Wort Englisch oder Duetsch koend.

3. Wemmer grad bi Sprocha sind, do redend echt wenig Luet Englisch (erstundlich).

4. I glauba di ganz Schwitz haet nid so viel Polizischta wia Moskau. Im Zentrum stoend an jedem Egga 2-4 Polizischta. (Ues haends zum Glueck no nia dr Pass kontrolliart...)

5. Was ues au no erstunt haet isch, dases recht viel Gruenflaechana und Paerkli haet.

Jo das isch bis jetzt so z'Wichtigschta in Kuerze.

Morn goemmer mol zum Kreml und uf da rot Platz (go Demonstriara ;-))

MOSKAU

Guata Tag liabi Leserinna und Leser vo uesam Blog.
Miar sind nochera funny Zugfahrt in Moskau ako. An dr Wissrussischa Grenza haends biz lang gha aber isch alles Problemlos gloffa. Und daenn haemmer oepis super speziells erlebt: Noch dr Grenza fahrt dr Zug ina Werkhalla ina. Alli Waega werdend abghaenkt und glupft mit allna Luet no im Zug. Daenn werdend amol schnell (ca. 1.5 Stund) alli Drehgsteller usgwechslet und daenn gots witer.:-)
Aber miar glaubend das muass si, well punkt 08.00 simmer in Moskau gsi. Iar haend sicher no alli gschlofa, bi eu isches do naemlich erscht 06.00 gsi. Jawohl, miar sind eu jetzt zwei Stund vorus (haha...).
Jo und z'Hostel haemmer au grad uf ahib gfunda. Uf da erscht Blick isches a huara abstigi. Aber d'Luet sind cool do und dr Michi unterhaltet sich fliessig uf English (Bemerkung fuer Sabrina:-)).

Soli gnuag fuer huet. Bildli und witeri Bricht us Moskau koemmend sicher bald.

bye bye

Tschau Prag...Hallo Moskau

Soli, Prag haemmer gseh. Isch cool gsi huet dStadt nomol bi Sunnaschii azluaga und zeinta oder anderi Biarli imena Beizli ztrinka.
Am 11i fahrt uesen Zug richtig Moskau. Miar sind amol gspannt wie dia biz laenger Zugfahrt wird...!
Moskau meldet guats Wetter fuers Weekend und 20 - 22 Grad. Juhuuuuuuuuuu...

Zugfahrt und Prag

Hallo,
nochdem mr di letschta 2 - 3 Stund mir Flu, Mimi und Martin in Zueri verbrocht haend, simmer in uesa Schlofwaga. Dr guati Tip vom Martin, dasma jedi Reis mitera guata Flaescha Wii afangi haemmer natuerlich grad befolgt.:-) Danka nomol fuerd Flaescha Martin und Flu, haet sehr gmundet...!
Zugfahrt ansich isch easy gsi. Obwohls recht eng gsi isch unds bi da obera Better heiss gsi isch wia innera Sauna.
Uesers Hostel in Prag haemmer recht guat zFuass gfunda. Isch ganz OK do, alles isch suber und gnuag Platz zum dSacha igschluessa haemmer au.
Huet haemmer Prag amol zFuass besichtigt, vom 10:00 bis 15:00. Cools Staedtli, nur an gwuessna Stella biz viel Touris.:-)Huet obig goemmer mol biz oepis schlaus fuer in Usgang go suacha, miar sind gspannt...
bis bald

as got nüma lang!!!

so mini dama und herra, miar stönd grad bi t minus 52 stund und 48 minuta.

a jo und dr michi versuacht grad all das in sin rucksack packa...!:-)