Portland, Stadt der Rosen

Hoi mitanand,

sitem 24.08. simmer jetzt am Portland unsicher macha. D'Stadt isch recht gmüatlich und suber. Isch no spannend, Portland hät gar kai rechti Skyline. Anschinend dörfends do kai Wolkakratzer baua. As git an Hufa Bar's und Pub's mit Livemusig. Aber as git fascht a kli z'viel zum usprobiara. Was für üs au super isch: As git in kainem Ort in da Staata soviel lokali Biar wia do in Portland. Und muass doch säga, dia schmöckend echt huara guat!

Jo und so hämmer üs wieder einiges agluagt und zwei, drei luschtigi Öbig gha.

Irgendwo in dr City uf dr Stross. Dr Matt Groening (Erfinder vo Simpsons und Futurama) kunnt us Portland.

Im japanischa Garta. Zwor recht spirituell aber schön zum aluaga.

Und wia gsait, "Stadt der Rosen".

In Portland gits an Rosa Versuachsgarta mit 7000 Arta. Isch scho fascht kli kitschig aber schmöcka tuats...mmmmh!

Und mora gots witer mitem Bus 70 Meilen in Weschta and Küschta vo Oregon. Üsers erschta Ziel isch Seaside.

Soviel bis auf weiteres, machends guat und bis bald.

back in the civilization

Halli Hallo,
do simmer also wieder ganz und an einem Stuck zruck in Seattle.
Kurz und bündig, dr Trip isch dr HAMMER gsi!!!!!!
Gstartet simmer eba ufem Stevens Pass, bi Näbel und wiedriga Bedingiga. Noch dr erschta Nacht am Josephine Lake hämmer aber scho wieder guat Wetter gha. As kunnt mr kli vor wia wemmer an Packt mitem Petrus gschlossa hettend. ;-) Vom zweita Tag awäg hämmer nu no super Wetter gha. D'Landschaft und d'Natur isch echt umwerfend gsi. Öpa dia ischs zwor me a "Tortour" als a "Tour" gsi. So mit 25 kg ufem Buggel stundalang stail ufa und aba durch Täler und über Päss got recht and Substanz! aber as het sich jeda Schweisstropfa glohnt!!! Miar händ au all Tag könna "duscha". D'Bergseea sind zwor nid würklich warm (iskalt) aber erfüllend hervorragend iren zweck. :-) Und so simmer dänn noch 54.7 km und 6830 Höhameter (uf und ab) ufem Campingplatz 8 Meila vor Leavenworth ako. Uf Leavenworth simmer dänn per Autostop ko. Miar hend i däm 2000 Sehla Dorf nomol so richtig z'Wetter könna gnüssa (ca. 34° C).
Jetzt simmer wieder in Seattle und planend wacker an da nögschta Plän. Am Mäntig gots dänn witer uf Portland (Oregon). Also ab in da viart Bundesstaat. Bis döt ana machemer jetzt aber Seattle no kli unsicher. :-)

2. Nacht am obera Doelle Lake

just wildernes

3. Nacht Lake Edna

Wundernasa gits au in dr Wildnis

As isch echt stail uf und ab...

...aber nochema Bad im See oder Fluss...

...hämmer amel wieder nüm gwüsst wia blöd tua!!! ;-)


Und das hämmer üs mit Sicherhait verdiant! Oder???

Na dann Proscht und bis bald!!!

Seattle

Hallo und guata Tag,
jetzt simmer scho wieder dr viart Tag inera Grossstadt. Isch afang recht schwierig, so Städt z'beurteila oder sega wias sind. Irgendwia sind alli extrem anderscht und glich alli glich.
Miar wohnend ima Hostel ima Nordbezirk. 30 Minuta mim Bus vo Downtown awäg. Isch ruhig und gmüatlich grad nebam Meer. So erläbemer d'Stadt au kli anderscht wia wemmer im Zentrum während.
Miar händ jetzt scho 4 - 5 Bezirk gseh in Seattle. Isch no luschtig, jeda wirkt wia a klini eigni Stadt. Geschter Obig simmer ans Baseballspiel Seattle Mariners gega New York Yankees. Cool gsi zum mol live mit erläba. As isch kli gsi wia imna Film. Glaub ali Klisches sind wohr. Ali laufend mit Pommes Frites, Hot Dogs, Pop Corn und Biar uma. Dänn hets as Maskotchen wo ständig am umahüpfa und tanza isch. Hinter üs isch eina gsi wo di ganz Zit irgendwelcha Müll uma brüllt het. Vorem Spielstart het aini d'Hymna gsunga. usw. Echt witzig gsi. Baseball sälber got nid würklich ab. Isch worschinlich dr Grund das d'Teams 186 Spiel (!!!) im Johr hend. A jo und d'Yankees hend dänn knapp mit 11:1 gwunna. ;-) Also di letschta zwei Innings sind nu no d'Hälfti Lüt im Stadion gsi.
Zum gröschta Tail simmer aber a 6 - tägigi Wandertour am plana gsi. Isch no recht schwierig do ohni Auto. D'Busverbindiga ind Berga und zu da Parks sind recht scheisse. Miar hend dänn aber voma Ranger a guata Vorschlag griagt. Miar düsend Mora (15.08.) zum Stevens Pass. Am 21.08. nämemer dänn dr Bus in Leavenworth zruck uf Seattle. Di ganz Strecki isch ca. 65 km lang mit viel uf und ab. Miar bewegend üs uf da Weg bis uf ca. 2200 M.ü.M. Di überflüssiga Sacha vom Rucksack kömmer im Hostel lo. Miar freuend üs extrem uf das nögschti Abentüür!!!

üsers Chiller - Hostel isch echt cool!!!


Seattle Downtown

Glaub mit dem Turm verbindend ali Seattle?!?

amol a cool gsprayti Huuswand

im Mariners Stadion



Guat das wärs wieder gsi vo üsera Sita. Machends guat und miar meldend üs innera Wucha wieder unbeschadet und kaputt. ;-)

Back in the States

Hallo mitanand,

als erschts mol au no vo dera Stell danka viel mol fürd Geburtstagswünsch!!! Han mega freud gha!!!

Noch 7 Tag Whistler hets üs jetzt wieder witer zoga. Miar sind hüt (10.08.) mitem Greyhound-Bus noch Seattle gfahra. Erstunlicherwis hemmer an dr Grenza wieder an neua Stempel griagt. Miar könntend jetzt also bis am 08.11. in da USA bliba. Kunnt kai Sau (tschuldigung) druss bi dem System! Jo nu jetzt simmer uf all Fäll do. ;-)

Whistler hemmer köna gnüssa. Vor allem di erschta 4 Tag hemmer super Wetter gha. Miar hend zwei längeri Wanderiga gmacht. Di erscht 9.5 Stund und di zweit ca. 7 Stund. Di letschta 3 Tag sind denn bewölkt gsi mit zwüscha dura Sunna. Und in dr letschta Nacht hets üs voll versaicht. Z'Zelt gseht us wia wemmer im Morascht gläga werend. :-) Miar sind's grad im Zimmer am tröchna.
Leider isch bis uf Wandera, entspanna und zwei mol Usgang nid viel dina gläga. Isch a recht türs Pflaschter. So verglichbar mit St. Moritz. Uf da Klettersteig hemmer ungfüart nid könna und gfüart hets 130 Dollar kostet. Downhilla für ain Tag kostet 200 Dollar und so witer. As klises Biar kostet sogar 5 - 7 Dollar. Aber schön ischs glich gsi und an Bsuach lohnt sich uf jeda Fall.

Downhill-Meka Whistler

Zwei mol Rainbow-Lake

Harta Ufstieg gsi zum Wedgemount Lake...

... aber hät sich glohnt!!!

Übrigens hemmer ufem Retourweg vom Wedgemount-Lake nomol zwei Schwarzbära gseh. Eina isch öpa 10 Meter unter üs ufem Wanderweg gsi. Woner üs gseh het ischer ab in Wald. Dr zweit hemmer nu gseh davo springa im Wald. Schwarzbära sind also echt schüchi Artgnossa. Isch huara cool, dia Tiar so in dr Wildnis z'gseh!!!

Soli das muass wieder langa für da Moment, müand jo sicher au wieder ali go schaffa... ;-)

Bis bald us Seattle

Und witer gots...

hallo,
also Vancouver isch echt a cooli Stadt mit extrema Gegasätz. Do hets modernschti Hochhüser und a Gass witer gsehts us wia ima "Gheto". Aber insgesammt ischs tip top suber. Han amol zum Michi gsait i glaubi dia Stadt seg gründet worda vo: 1. Chinesa, 2. Kiffenda Hippies, 3. Junkies / Penner und 4. Bi-sexuella.;-) Han no nia so viel strubi Lüüt uf einem Hufa gseh. Am 1. August hemmer an dr English Bay no a riesa Führwerk könna verfolga. Danka an dera Stell no für da Tip vor Mara. Am 2. August hemmer Velo gmiatet und sind um da Stanley Park und suss no uma düst. Miar hend amol a Tandem usprobiart, huara luschtig gsi.

Menschamassa am 1. August, English Bay. Sorry Mara aber han di echt nid gfunda... ;-)

Tandem-Tag

Noch 5 Täg Party in Vancouver simmer dänn am 3. witer uf Whistler. Miar händs am erschta Obig scho nid könna lo und sind bis am 3 in Usgang. Whistler isch so ähnlich wia bi üs Davos oder d'Heid oder Flims. Amol z'Dorf wenigschtens. Und as isch as riesa Downhill-Näscht. Aber halt wieder alles teuer. Miar sind ufem Campingplatz, 2 km nördlich vom Zentrum. Mora gömmer dänn mol biz z'Fuass ind Berga.

Whistler Mountain

isch an recht gföhrlicha Ort... ;-)

Und endlich hemmer no a Bild voma Schwarzbär. Üs isch zwor fascht z'Herz ind Hosa gheit wo dä koga uf zmol 5 Meter näb üs gstanda isch. Miar sind z'Fuass unterwegs gsi zum Camping. Uf zmol hets knackt im Wald näba dra. Nummer drei womer jetzt gseh hend. Jetzt wüssemer au, wiso dasmer z'Essa müand ufhenka an da Bäum ufem Camping.

A paar guati Bildli kömend sicher no, Miar sind bis minimum am Mäntig (10.08.) do in Whistler.