MEXICO

Hallo Schwiiz (und suss uf dr Welt),

lang händer nüd me ghört. Isch jo aber maischtens as Zaicha, das alles guat isch. Ziit rennt und rennt...

Üs gots usgezeichnet! Miar händ am 26. San Diego verloh, in Richtig Mexico. Noch 29 (!!!) Stund Busfahrt simmer am 27. am 8i am Obig in Cabo San Lucas ako. Fantastisch do, nur kli z'Touristisch. Zum Glück raisemer momentan nid in dr Saison...! Di mexicanisch Grenza isch super gsi, nid mol dr Pass hämmer müassa zaiga. Komisch, aber na ja... Jetzt simmer amol do und gnüssend witerhin d'Sunna und di warma bis haissa Temperatura.

Vo Cabo San Lucas gits dänn spöter Bilder. Zerscht mol no San Diego.

Suber cooli zwei Wucha hämmer in dr Süd Californischa Metropola verbrocht. Insgesammt simmer in 4 Hostels gsi. Jedes ima andera Stadtteil. So hämmer glaub kli alles gseh und überall Party gmacht. 12 Täg lang hät üs d'Lisa (wer sich nüma erinneret, bitte nomol dr Bricht vo Vancouver lesa...) bsuacht. Miar händs super luschtig gha mitanand. Danka an dera Stell nomol fürs "Bsüachli". Go surfa simmer au wieder zwei mol. Wird also scho langsam profesionell. ;-) An aim Tag simmer in da "World famous" Zoo. Isch also würklich an coola Zoo. "World famous" muass bi da Amis aifach dazua stoh. Isch also an Platz womas guat kann ushallta das San Diego!

Skyline vo San Diego (gfötelet vo Coronado)

Sunnauntergang mitema küala Biar im Hostel am Pacific Beach

und das isch während am trinka vom küala Biar.

So USA isch also Vergangahait und ali wo am Afang vo üsera Rais gsait händ miar segend z'schnell unterwägs und sowiso im September scho wieder dahai...hmmm...Sorry!

D'USA händ recht überrascht. As git 1000 super schöni und echt sehenswerti Plätz und miar sind "nu" in 6 Bundesstaata gsi. An hufa Klischees treffend voll zua und öpa kunnt ma sich echt vor wia ima Film. Lüt gseht ma alles, aber würklich alles. Bi üs während viel scho in dr Klapsi. Aber das isch OK so und ghört aswia au dazua.

Miar zwai könnd also d'USA zum Backpacka definitiv witer empfehla.

So jetzt aber Schluss, muass go spanisch lerna...

Las Vegas und Los Angeles

Hallöchen,

so, Las Vegas und Los Angeles hämmer jetzt au amol gseh.

So a klisas statement vo üs:

Las Vegas: Isch scho krass was dia ind Wüaschti gstampft händ!!! D'Stadt als solches isch recht hässlich. Z'einziga wo halt echt voll glemmer isch und voll puscht wird isch dr "Strip". Also d'Stross mit allna Casino's und Hotel's. Irgendwia isches scho no luschtig zum mol dur all das dura laufa.Was au sehr gail isch an Vegas, dia händ Outlet- und Factory-Stores ohni ende. Döt got ma sogar als als maa go shoppa. ;-) Also Fazit: nice to see aber nüd veruckts.

Los Angeles: Dia Stadt isch jetzt aifach nur riesig! Miar sind in Venice Beach im Hostel gsi. Isch huara gmüatlich do mit an hufa struba Lüt. D'Stränd sind echt cool und ebafalls riesig. Hollywood und Malibu sind halt au luschtig zum mol gseh, well mas immer in Film gseht. Aber me au nid. Krass isch gsi, vo Venice Beach uf Long Beach mit Bus und U-Bahn duret rund 2.5 Stund. In dera Ziit fahremer normal dur me als di halb Schwiiz. Sind no anderi grössaverhältnis. Also i denk in L.A. wür mas au guat länger ushalta. Git aifach viel zum gseh oder ma liit aifach an Strand und gnüsst 25° und Sunna.

"The Strip" in Las Vegas

z' New York New York (isch dänn nid z'gröschti)

muas ma jo ufera Photi ha...

Venice Beach. Z'wiisa Hochhus ganz links isch vo Santa Monica

an leera Long Beach

Soli das sind kurz news vo Übersee gsi. Mora gots noch San Diego für a kli längeri Ziit. Denka ca. 2 Wucha.

San Francisco - Yosemite - Death Valley - Las Vegas

Hallo endlich wieder amol.
Miar händ wieder sooooo viel erläbt und d'Ziit got momentan sooooo schnell.
Nocham Kurzufenthalt in San Francisco hämmer könna mir Nora und am Simon in da Yosemite Nationalpark fahra. Dött händ sich üseri Wäg dänn trennt. Danka an dera Stell nomol härzlich!!! Im ganza hämmer zwei Wucha im Yosemite verbrocht. Jeda Tag simmer zwüscha 2 und 10 Stund unterwägs gsi und händ 11 Gipfel gmacht. As isch an Traum gsi und z'Wätter hät wieder amol voll mit gspielt. Am zweitletschta Tag isch bewölkt gsi, suss just SONNE und zwüscha 25 und 35 Grad (Celsius). Noch dena zwei Wucha ustoba simmer wieder and Stross gstanda go Hitch-Hika. Noch drei Stund hät üs d'Amy uf Bishop mitgno. Sind ca. viar Stund fahrt gsi. Do mr in Bishop nüma witer ko sind übers weekend, hämmer üs an klina Lieferwaga gmiatat. Jo i waiss isch nid ganz normal aber ma muass sich jo z'helfa wüssa...! Und so simmer in drei Tag vo Bishop durchs Death Valley noch Las Vegas gfahra. Death Valley isch für mi überwältigend gsi!!! An richtiga Kontrast zum Yosemite. Well mr scho nid uf da högscht Punkt vo Amerika ko sind, hämmer wenigstens zum Tüfschta wela. Isch au kli weniger streng gsi. Badwater -85.5 Meter unterem Meeresspiagel. Miar sind dänn sogar no z'früa vor Las Vegas gsi. So hät au dr Hoover Staudamm no müassa dra glauba. Arizona hämmer aber noch 10 Minuta scho wieder verlo. Jo und jetzt simmer in Las Vegas...bi gspannt was do no alles passiart.

Für dia wos intressiart no üsers Yosemite Gipfelverzeichnis (dia wos nid intressiart, una häts no Bildli...;-)):
Halfdome, 8842 Fuass, 2695 Meter
Liberty Cap, 7046, 2148
Cathedral Peak, 10911, 3326
Cockscomb, 11065, 3373
Lembert Dome, 9450, 2880
Vogelsang Peak, 11516, 3510
Simmons Peak, 12503, 3811
Indian Rock, 8522, 2598
North Dome, 7542, 2299
Eagle Peak, 7779, 2371
El Capitan, 7569, 2307

Hina ir Mitti: Half Dome

Links: El Capitan (The Nose)


Links: Half Dome,

Rechts: Liberty Cap

Aina vo da hocha Wasserfäll

Usblick vom Cathedral Peak

Ufem Wäg zum Simmons Peak

Morga Stimmig bim Wandera (06:30)


Aina vo witera 3 Schwarzbära wommer gseh händ
(Isch as rechts schaiss Gfühl, wenner aim so aluagt im Wald...)

Üsa top Lieferwaga, gschlofa hämmer hina dina.

Death Valley am 7ni am Morga


An Usblick über Sanddüna

Abendstimmung

As git also öffters au mol öpis gsunds (und dia wo sich an irgendwelcha Bart wend gwöhna, voilà...)

Und während dr aint kocht...

...muass sich dr ander jo au beschäftiga! ;-)

Und so gots witer:

05.10. - 08.10. Las Vegas

08.10. - 12.10. Los Angeles

12.10. - ????? San Diego