Vancouver

Sodali und wiamer scho gsait händ: "the trip must go on..."

Miar händ di letschta paar Täg in Smithers no alles probiart zum da Bus flicka. Dr Roy (Mech) het z'Getriebe no (gratis) göffnet. Nix mehr zu machen. Und super isch no dazua ko, dasma as Auto us da USA in Kanada nid verkaufa kann. Hät grad no passt. Vom Schrottplatz hettemer 400 Dollar griagt. Han dänn am Roy gsait, er könn macha waser well mitem Bus. Är hät dänn gfunda, er flickna irgend wänn und verkaufna wenn möglich an en Schwiizer wo wieder ind Staata fahrt damit. Wer intressa het, i han d'telephonnummera.;-) Aber wia d'Lüt us Smithers so sind, druckter üs am Schluss 400 Dollar ind Hand. Dä Ort blibt üs mit Sicherheit ewig in Erinerig!

Dr nögscht Bus isch dänn au bald mol gfahra. Noch 19 Stund (inkl. 2 h Ufenthalt in Prince George) simmer am 30.07. in Vancouver ako. Und au do isches fantastisch Wetter. 35 Grad isch gsi bir Akunft. Ideal zum mit 30 kg Rucksäck Hostel suacha. Zerscht hemmer gratis Internet gsuacht. Klaro, hemmer schweissgebadet gfunda. Nochhär ischs ab uf Hostel suachi. Super, alles voll! Im dritta Hostel hemmer zwei Dütschi girls troffa. Miar müand so mitleiderregend uf dr Schnorra usgseh ha, dass üs gfrogt hend ob mr mit ina mitko welend mim Auto. Und so simmer z'viarta ufd Suachi nochema Schlofplatz. Schlussendlich simmer jetzt ima Motelzimmer mit zwei King-Size Better. Also dr Michi und i in einem und d'Lisa und Christina im andera.
Hüt (31.07.) hends üs mim Auto mit gno dur Down Town uf North Vancouver und nochhär zruck an en Beach.
Recht witzig mit dena zwei und Vancouver macht bis jetzt au an super Idruck.

Back als Backpacker...

...und trotzdem no guat druff!

Wenn dr Humor verlora gängt wer jo au tragisch!!!

Ok und jetzt ernschthaft zu Vancouver...

Strandfeeling in Vancouver!!!

Miar gnüssend also jetzt mol d'Ziit in Vancouver und dänn gsehmer witer. Dr Bus hemmer scho fascht vergessa.;-)

Smithers

Aaaaaaaaaaaaaaaaaaaaaaaaaaaaahhhhhhhhhhhhh... i glaub i dreh dura!!!

Oder wiama so schön sait: "Erstens kommt es anders und zweitens als man denkt".

Dr Bus isch (scho!!!) zur sau. Getriebe im Arsch. Unglaublich.

Aber mol vo Afang a. In Prince Rupert hemmer jo rega (sorry, rääga fürd Unterländer) gha. Also witer. Miar sind dänn ab uf Smithers und hend do wela a paar Tag bliba und Wandera...! Am Fritig Obig simmer ako. Nochema luschtiga Usgang simmer nebam Vistor Center go schlofa (in Bus). Im Usgang hemmer eina kennaglernt vo do und er het üs gfogt ob mr go fischa welend am Samstig. Und tatsächlich am Morga am halb 11i ischer z'düsa ko mit sim Chef. Miar sind denn 15 km richtig Prince George gfahra (uf Telkwa) und hend döt as Schluchboot in da Fluss ghift. As isch an richtig gaila (sorry) Boot-Trip gsi mit viel Biar und sehr viel lacha.

Dr Denis (Chef vom Kyle) het dänn sogar no an ca. 25 Pfund schwera Spring Salmon (Lachsart) usa. Isch an richtiga Kampf gsi.

Am Obig simmer na dänn bim Baseball Spiel go zualuaga. Si hend aswas a Turniarli gha am Samstig Obig und am Sunntig. Luschtig gsi zum luaga, as isch wiana Grümpelturniar gsi. Und i weiss jo nid ob all Kanadiar so druff sind aber d'Smitherser sind nu am suffa und an Teil au no am Kiffa, wia im Film.

Uf all Fäll sinds huara fründlich. Si hend üs am Sunntig an gratis Abschlepper organisiart und schlofa hemmer

bim Kyle könna.

Und hüt (27. am Morga) dänn di schlechta Nochrichta, dr Bus isch eba zur sau. Er fahrt nu no rückwärts. Sprich Getriebe kaputt. Jo mol luaga was jetzt lauft. Dä vor Garage isch no am umaluaga aber so wias usgseht ischs vorbei mit am VW-Bus. Miar probiarend sicher no zum na für a paar Dollar zverkaufa.

Do glich no as paar Bildli:

Kyle und Bill ufem Boot

OK, riesig ischs nid gsi, z'Boot aber het glanget für 5 Lüt

An mächtig stolza Denis

Adieu VW-Bus

OK und was nun? Ganz eifach, dr Trip got witer als Backpacker. I denka mora oder übermora gömmer mol uf Vancouver. Und bis mr dött sind hemmer sicher wieder neui Ideea.
Bis bald und an Gruass ind Schwiiz

Canada

Hallo mitanand,

so miar gänd üs au wieder amol d'Ehr. Aber isch in da Witena vo Kanada nid immer eifach zum Internet finda (gratis).
Zerscht mol a kurzi Standortbestimmig:
Miar sind vo Anchorage ufem direkta Weg (Glenn Highway und Alaska Highway) uf Whitehorse. Vo dött us uf Watson Lake und dr Highway 37 724 km in Süda und dänn uf Prince Rupert, wommer jetzt ama Biar sitzend.
Miar sind aber notürlich nid nur im Auto gsässa sondern sind öpa hundert mol usgstiega und händ das echt Fantastischa Land agluagt. In Whitehorse simmer an Tag bliba, händ z'Auto mit Essa und Trinka gfüllt und sind am (Samstig) Obig in Usgang. Echt luschtig gsi i soma Kaff-Städtli. A paar mol simmer dänn au no go wandera. Dr längscht Hike hämmer am Kluane See gmacht. 4 Stund simmer dr Berg ufagloffa wia di pikta bis uf 1922 M.ü.M. Dafür hämmer a soper Ussicht könna gnüssa und händ ca. 60 - 80 Dall Sheep (Dall Schof) gseh. Insgesammt simmer 6 Stund unterwägs gsi. Noch sonera strenga Tour wär jo normal a Duschi nötig, do mr aber keini händ simmer in da licht kalt See go bädala. Het sicher guati Photana gä. ;-)
Hüt simmer in Prince Ruport am Pazifik ako. Dia Landschafta hauend üs echt fascht um. Hüt häts zerschta mol sittem 17.06.09 (!!!) gregnat. Miar hän scho fascht nüm gwüsst wia sich das afühlt.

A paar Imressiona:

Wunderbari Fluss- und Waldlandschaft


vom Sheep Creek Mountain (1922 M.ü.M.) us

und ufem Abawäg

an andera See unterwägs

An Gletscher vor Steward

No nöcher bi Steward (au i däm See hämmer Badet, Brrr...)

D'Blätter sind do scho fascht grösser als dr Michi

Einige Tierchen:

Dall Sheep


Streiffenhörnchen (oder so)

Moose (Elch)

Weisskopfadler ((Bald Eagle)

Übrigens hämmer hüt Morga dr zweit Schwarzbär vo ganz nöchem gseh. Miar sind aber z'langsam gsi zum Phötala. Dr Michi isch grad am Karta aluaga gsi und i bin gfahra wo uf zmol an Bär am Strossarand gstanda isch. I han zwor grad bremst aber mit 80 kmh gots halt glich a wili. Woni in Rückspiagel gluaget han ischer über d'Stross und ab ind Büsch. Echt dr Hammer so Wildtier (au Elch) vo nöchem gseh!!!

Üsi witera Plän falls mr nid grad wieder zum schriba kömmend:

Miar wend noch Jasper ind Rocky Mountains und vo dött uf Calgary und dänn uf Vancouver.

Also somit wünschend miar allna a guati Ziit und bis...

Homer und Seward

Hoi Schwiiz,

sola, miar haend ues glich no versoehnt mit Alaska.

Dr Sueda vo Alaska isch wuerklich super schoen und absolut empfehlenswert. As isch a vo Berga, Taeler, Gletscher und Seea praegti Landschaft.

Am dritta Tag in Homer simmer am 7ni am Morga mitema Bootstaxi uf di gegaueberligendi Meersita. Ds Boot haet ues daenn in dr Noechi vomena Trail (Wanderwaeg) abgsetzt und isch wieder abduest. Isch recht speziell gsi aifach aswo abgsetzt zwerda mit da Wort: "Viel Spass in dr Wildnis und bis morn Obig". Nochera guata Stund laufa haemmer ima Flussdelta tatsaechlich an Schwarzbaer entdeckt. As paar Minuta haemmer na koenna beobachta bevorer wieder in Wald isch. Nochema abentuerlicha Pfad simmer noch 4 Stund laufa bim Gletscher ako. Fantastisch wia gross dia Gletscher do sind und zum Teil bis ans Meer goend. Noch usgibigem Phoetala und uskundschafta isch nomol 2 Stund steil durchs Dickicht zum Schlofplatz (Emerald Lake). Miar haend no badet im See und sind daenn bald todmuead ins Zelt krocha. Nochera guata Nacht simmer gega Mittag wieder los richtig Treffpunkt mim Boot. Knappi 6 Stund spoeter simmer daenn am abgmachta Punkt ako. Z'Boot isch puenklich ko ues go abhola. Und so isch das Abentuer au scho wieder verbie gsi. Haet echt guat tua mol d'Ruah und d'Wildnis vo Alaska richtig z'gnuessa.

Am 14.07. haemmer in dr noechi vo Seward no a Eintages-Trip gmacht. As isch am Exit-Gletscher no bis uf 3480 Fuass hoechi (ca. 1100 M.ue.M.). Vo doett oba haemmer an sensationella Blick uebers Harding Icefield gha. Mueand mol luaga im Internet, wia gross dass das Isfeld isch.

I koent oepa zwei Stund ueber dia paar Tag schriba und ca. 200 guati Photana ufalada. Lohns jetzt aber an dera Stell.

Ufem Boot-Taxi in Homer (recht frisch gsi)

Wunderbari Kueschtalandschaft

Welcome to the dschungle (Trail durch meterhochs Gras)

Emerald Lake mit blick uf da Gletscher

Exit Gletscher

Nomol

Harding Icefield (oder an klina Teil davo)

Einigi Tiar haemmer au no gseh:

Weisskopf Adler (Bald Eagle)

Eichhoernchen

Murmelis (oder Pfeiffchatz)

Und daenn haemmer no an Schwarzbaer, zwei Elch, 12 Bergziegen und jedi Menge Voegel.

Ebbe 40 Meila suedlich vo Anchorage

Das waers daenn wieder gsi fuer da Moment. Zur Ziit koemmer eu halt nid regelmaessig ufem laufenda halta do mr mim Bus unterwaegs sind. Isch uebrigens super. Isch no luschtig, d'Graet lademer bi Schualigaeng oder an irgendwelchna Gebaeude, Duscha und WC gits "gratis" uf Campingplaetz, usw. OK miar mueand scho luaga dasmer nid zu dreischt tueand aber bis jetzt klappts wunderbar aso.

Huet Obig fahremer ab in Richtig Kanada.

Bis bald, euri Galgavoegel

Nordalaska

Hallo,

so miar stönd grad vorem Hostel wieder in Anchorage. Do hämmer grad gratis Internet. As isch zum brüala gsi im Norda (für mi (Roman)).

Also zerscht di guata news. Dr Bus isch super und miar händ a schiess freud. 5 mol hämmer scho super dina gschlofa.

Und jetzt zum weniger schöna. Do ischma endlich mol i sim "Traumland" und dänn isches im ganza (wasmer gseh händ) Land an riesa Rauch ir Luft. Miar händ in Fairbanks mol nogfrogt und si händ gsait, as heg momentan grad rund 50 Waldbränd in Alaska. Und alli wo gmaint händ as seg kalt in Alaska, miar händ jetzt dr viart Tag 30 Grad heiss und für di nögschta füf Tag nüd neus in Sicht. Drum simmer au wieder in Süda zruck. Miar versuachend üsers Glück in Homer, ganz im Süda.

Jo guat, ei mol (NU!!!) simmer 6 Stund go Wandera. Im Denali State Park. In da Nationalpark simmer nid wegam Rauch ir Luft. Isch kli tür für das woma so gseht. Nocher simmer ufem Denali Highway in Osta und vo dött uf Fairbanks.

Für eu no as paar Idrück:

üsa VW-Bus, Johrgang 1993

usgrüschtet mitema Tischli. D'Rückbank kama abaklappa und füra zia zum schlofa.

Usblick bim Wandera im Bäragebiat

ungefähr grad hina gseht ma normalerwis dr Mt. Mc Kinley

und soviel zum Rauch in dr Luft...

Also z'Reisa isch üs no lang nid verganga, aber dr Fruscht isch im Moment grad recht gross.

Bis bald, hoffa mit bessera Bilder

Anchorage

Juhuu allersiits,

miar sind jetzt scho a paar Tag in Anchorage und händ üs scho kli igläbt. Wetter-technisch ischs super momentan. Jeda Tag Sunna und ca. 20 - 25 Grad warm. Und luschtig isch, dasd am 11i am Obig kasch ins Bett ligga und d'Sunna schiint eim no schön an da Kopf. Recht speziell. No besser isch gsi, womer geschter usem Pub sind am halb 2 und as isch so Dämmerliacht gsi dussa. Für dia paar unter eu wo jetzt scho wieder denkend miar segend nu am sufa, nö nö nö, isch zerschta mol gsi sit Hawaii.

Iar frogend eu jetzt sicher was miar zwei so lang in dera ruhiga, gmüatlicha Stadt machend?! Also kurz gseit miar händ öpa hundert Variantana prüaft, wiamer wend witer reisa. Nochdem mr jeda Tag am abchecka, afroga, Büro's bsuacha und so witer gsi sind, hämmers hüt doch no gschafft as Auto z'kaufa. Z'grossa Problem isch z'versichera gsi. Niamert hät üs wela versichera. Aber hüt hämmer a internationali Versicherigsgsellschaft gfunda. Jetzt hämmer a Versicherig und a günschtiga VW-Bus (woma kann schlofa dina). Mora no zahla und ilösa und dänn kanns endlich losgo mir Bärajagd. ;-) Nai Mama's kai Angscht, miar gönd nu di schön Natur go aluaga.

Sind recht strengi (mental) Täg gsi mit an hufa up's und down's. Miar freuend üs jetzt richtig zum loszücha, ab ind Wildniss.

Downtown Anchorage

Dia Köga händ voll Molinis vergessa uf dr Tafla...

Bis hoffentlich bald