In 17 Täg vo Portland uf San Francisco

Hallllllloooo,

miar läbend also no und as got üs blendend. Am 13.09. simmer noch 17 Täg Hitch-Hiking (stöppla) in San Francisco ako.
Agfanga hämmer in Seaside an dr Küschta vo Oregon. Di erscht Nacht hämmer grad mol am Strand gschlofa. Isch no a luschtigs ischlofa und verwacha gsi. Dr zweit Tag hets gschiffet und Näbel gha. Isch also guat gsi zum a Break macha und am Michi im Hostel as Geburtstagsmenü kocha. Tag 3 simmer los z'Fuass über da Tillamok Head noch Cannon Beach. Dött hämmer nomol a Nacht unter freiem Himmel verbrocht. Am nögschta Tag ischs dänn ab ufd Stross und Daumen raus. Am Afang hämmer nonig so d'Geduld gha zum lang warta und sind immer wieder Stückli gloffa. Am Nomittag noch 12 Meila laufa hämmer nüma könna und irgendwenn het üs eina mit gno. As isch mega intressant, was ma alles für Lüt trifft mit stöppla! Finda das sött ma fascht mol gmacht ha...! Tag 5 isch wieder Ruhetag gsi. Üs hät dr Strand bir Nehalem Bay so fasziniart, dass mr grad 2 Tag bliba sind. Am nögschta Tag hämmer insgesammt 4 Fahrta griagt. So richtig Stückli für Stückli ab in Süda. Und so sind d'Täg verstricha. Uf da Camping hämmer immer Velofahrer troffa wo di ganz Küschta durab düsend. Noch as paar Tag trifft ma immer wieder di glicha. Hät öpa mol an luschtiga Obig gä. In Bandon simmer dänn 3 Tag gsi. Nid wells so umwerfend gsi isch, me wells üs jedi Nacht versaicht hät. Nochema witera Tag mit 2 Fahrta häts dänn am 08.09. Fortuna mit üs ganz guat gmaint. Nochera guata Stund Stöppla isch a Büsli usem Campground gfahra. Si hend zerscht diskutiart obs üs sölend mitnä und händ sich dänn für jo entschieda. Im Büsli sind d'Nora und dr Simon us Winterthur ghockt. Si händ au nid so rechti Plän gha wos genau wend hi und so simmer schlussendlich bis San Francisco mit ina. Was söll ma do no sega??? Z'Image vo Züri hät an Quantasprung gmacht! So simmer also z'viarta di californisch Küschta aba gfahra. In Casper (riesa Kaff!!!) simmer ans Konzert vo "The English Beat". Dia spielend SKA. Isch echt dr Hammer gsi. Am 13.09. simmer über d'Golden Gate Bridge uf San Francisco ina gfahra.
Könnt no viel viel me schrieba wasmer alles erläbt und gseh händ. Aifach so viel. Dia Küschta isch übersäht mit traumhafta Ussichta, Stränd, Buchta usw. Lohnt sich also definitiv. A jo und d'Warteziit bim Stöppla isch so bi 10 Minuta bis 2 STund gläga (pro Fahrt).

Indian Beach zwüscha Seaside und Cannon Beach

"dito"

schönschti Sandstränd ir nöchi vor Nehalem Bay

dr Wind streifft meischtens nid nur licht dur d'Hoor...

do hani mol sona riesa Möwa im Flug verwütscht

im californischa Redwood häts recht grossi Bäum. Bin also nid gschrumpft...

somewhere in north-California

an einem vo da gföhrlichschta Stränd vo California. Hät RIESA Wella!


Golden Gate Bridge


Simon, Nora und Michi im Hard Rock Cafe San Francisco

Soviel zu däm Raiseabschnitt. Am 16.09. gots in Yosemite Nationalpark. Miar dörfend nomol mit dr Nora und am Simon mit. Vorussichtlich werdemer ca. a Wucha dr Park erkunda, Wandera, Bergstiege, d'Nose (1000 Meter hochi Felswand) aba gaffa und wenns klappt kli go Bouldera.

Bis bald, machends guat und da Jäger nögscht Wucha nomol Waidmannshail!