Seoul

Wia versprocha a kurzi Zwüschameldig us Südkorea.

Am 4i am Morga simmer hüt uf. Ufem Flughafa isch alles ribigslos gloffa. Di 12 Stund Flug vo Auckland uf Seoul sind no ganz aständig uma.

Miar händ jetzt a Nacht im Hyatt Hotel ir Nöchi vom Flughafa. Miar hend no uf üsi Reis agstossa und denn no as "Stümpli" graucht (danke nomol dem Spender Coco).

Mora am halb 3 Lokalziit gots denn ab weschtwärts zruck ind Schwiiz.

Traditionsgmäss mitera 1 Dollar Nota azündet

OK, gibs zua, di ganz hemmer nid möga...

Also bis in as paar Stund, Tag oder aifach bald

Vo Invercargill bis Christchurch

Sodali, das werdend denn au scho öpa di letschta Idrück si, wommer eu vo dera Reis per Blog übermittlend.

Miar sind vo Invercargill direkt uf Owaka gfahra, wommer 2 Tag nu umagläga sind im Hostel. Voll motiviart zum nomol möglichscht viel gseh simmer denn ab uf Dunedin und via Lake Tekapo noch Christchurch. Do hämmer üs nomol mitem Jan und am Matthias troffa zum as paar Biarli vernichta. Isch denn au usa ko wia erwartet...

Jo und hüt gnüssemer nomol über 25° bi wolkalosem Himmel. Wia bschtellt für da letscht Tag.

Nugget Point bi Owaka. Uf da Felsa hemmer no an hufa Seehünd gseh.

Halbinsla im Oschta vo Dunedin

Gratis Camping (Wildcampa ir Nöchi vo Dunedin)

Majestätisch hetter sich üs no presentiart dr Mount Cook

Cathedral Place in Christchurch

Yep und mora heisst denn am 04:30 ufstoh und ab uf da Flughafa. Miar flügend via Auckland uf Seoul. Nochera gratis übernachtig im Hotel gots denn am 25. witer mitema Zwüschastop in Wien zruck ind Schwiiz. Flugziita sind 1.5 h, 12 h, 12 h, 1.5 h.

Miar meldend üs denn nomol us Südkorea...

over and out

Stewart Island

Hallo an alli wo scho lang uf en neua Itrag wartend.

Isch halt in da letschta Wucha nid ganga...

Am 06.02. simmer mitem Schiff vo Bluff uf Oban (Stewart Island). D'Rucksäck sind vollpackt gsi mit Essa und as paar meh oder weniger wichtiga Sacha für 12 Tag. As isch glichzitig üsers letschta Abentüür vo dera Reis (gsi). Z'Ziel isch dr North-West Circuit Track über 125 km gsi. Miar hend uf dia Tour no ds Moni us Dütschland mitgno.

I könnt eu jetzt zu jedam Tag 25 Zeila schrieba, do mr jo aber bald hai kömmend, kürzis kli ab.

Oft simmer üs kli vor ko wia Entdecker ima neua Land. Anderi mol ischs gsi wia ama karibischa Strand. Und wieder anderi mol hemmer halbi Balanceäkt über verwurzleti und schlammigi Weg gmacht. Wettertechnisch hemmer dr Petrus wieder uf üsera Sita gha. As het üs mit laufa nid ai mol versaicht, nur in da Nächt hets öpa gregnet bis gstürmt. Miar hend vo vielna Lüt ghört, das dr Track extrem streng seg und dr Schlamm knü tüf. Na ja. Also streng ischer uf alli Fäll. Vor allem macht dr Rucksack uf dr erschta Hälft viel us wenns viel ufa und aba got. Di traumhafta Stränd und Landschafta entschädigend aber jedes mol wieder fürd Strapaza. Dr Schlamm isch üs as paar mol so bis mitti Schinbei ko, tüfer aber au nid. Glauba allerdings, wenns me gregnet het wia üblich hets no kli anderscht usgseh.

Und so simmer also Tag für Tag, Hügel um Hügel, Beach um Beach immer witer, bis mr am 11. Tag wieder in Oban gsi sind. Dr 8. Tag hemmer üs allerdings no a Pausa gönnt. Miar hend super kalkuliart mitem Essa und hend üs bis zum Schluss immer könna satt essa. Z'Biar in Oban het denn so guat gschmöckt wia scho lang kais Biar me. Und das am 11i am Morga. ;-)

Waiss gar nüm was säga, bin so überwältigt vo dera Insla. Luagend eu aifach mol as paar Idrück a:

1. Tag, zwüscha Oban und Port William

typischa licht steila Ufstieg über Wurzla

durch Sanddüna wia Roman im Wunderland

Long Harry Hut, wunderschön gläga, licht erhöht über dr Bucht

Traumusblick ufd East Ruggedy Bay ganz im Norda

so gsehts us ohni Schlamm und Wurzla

Big Hellfire Hut, Blick über ds Sumpfgebiat im Oschta

Wildlife, gsehnd kli us wiana Krützig zwüscha Pinguin und Möwa ;-)

Und do a witers Highlight vo üsera Tour. An Kiwi. Sind so zum krummlacha dia "Vögel". Und überlischta zum phötela isch au cool, man klettere 1 Meter auf nen Baum und warte...

Dr frei Tag usgnutzt zum uf da 156 Meter hoch Big Sandhill laufa (Mason Bay Hut)

früana Morga bir North Arm Hut (aini vo zwei Great Walk Hüttena)

Zfrida, stolz und durschtig mitema klina Siegesstümpli

Jan, Michi, Matthias, Roman, Moni

Super luschtiga Obig hemmer denn no zema in Oban verbrocht. D'Details würend jetzt dr Rahma sprenga und wend glaub au nid alli wüssa. ;-)

Und jetzt düsemer mit üserem unzerstöhrbara Mazda gmüatlich d'Küschta duruf uf Christchurch.

Bis bald bald

laufa laufa tralala

Salutti,
miar sind witerhin voll am aktiv-reisa. Momentan hämmer au amol a kli Wetterglück.
Nochera Eitageswanderig uf da Roys Peak bi Wanaka simmer im Matukituki Valley ina klini Alpin-Hütta go übernachta. Am Morga hämmer bi guatem Wetter an super Blick uf da Mount Aspiring gha. Nochera Nacht im Zelt nebem Carpark simmer uf Glenorchy, guati 50 km vo Queenstown entfernt. Vo döt us hämmer a 3-Tagestour durch Caples-, Steele- und Greenstone Valley gmacht. Dr Tag druff simmer denn no uf da högschti Punkt vom Routeburn Track gloffa. Das isch an Great Walk, drum hemmer niana inera Hütta gschlofa sondern sind mit klinem Rucksack wia di pikta ufa und wieder aba.
Hüt machemer a Päuseli und morn gots denn ufa 5 bis 6 Tagestour.
Z'Auto lauft au immer no. Es het zwor Getriebeproblem, aber sit mr in dr Garage gsi sind und dä üs gsait hät, es machi wohrschinlich nüm lang laufts wieder hervorragend. Na ja die lieben Getriebe vo Automata. Jo nu miar redend am jetzt immer guat zua und denn klappts no bis Christchurch. Isch halt aber au nid licht uf dena Strossa. D'Zuafahrta zu da Tracks sind nid selta 10 - 40 km Gravelroad, sprich Naturstrossa inkl. Bachqueriga.

Und jetzt wieder a paar Idrück:

klina, frecha Robin

Steele Creek (am Horizont Greenstone Valley)

Routeburn River

Harris Lake z'oberscht vom Routeburn Track

So das ischs wieder gsi vor Reisefront. Haltend d'Ohra stiff und bis bald wieder!

Trails 3 und 4

Guata Morga,
an witera 3- und 4- Tagestrail sind wieder verbie.

Dr erscht isch 30 km südlich vom Fox Gletscher gstartet und isch ind Welcome Flat. Miar sind kli spot dra gsi (15:00) und nochera Flussquerig und ama teils schlamiga, teils steila Weg durch Regawald simmer am 20:30 bir Hütta gsi. 2 Minuta vor Hütta awäg isch a warmi Quella mit 3 natürlicha Pools. Hät grad guat tua kli ins über 30° warma Wasser ligga. Am zweita Tag isch denn no witer z'Tal hintera. Au dä Wäg isch recht aspruchsvoll gsi, mit Bäch quera, durch dichts Gstrüpp im Regawald und steil ufa. Noch 3 Stund simmer aber bir Douglas Rock Hütta ako. Vo dött hämmer a super Ussicht ufs verista Sefton-Masiv gha. Miar sind am Nomittag dött no kli go uma laufa und am Obig hämmer d'Hütta mit 8 Better für üs gha. Huara gmüatlich gsi. Am nögschta Tag simmer in eim Stuck usa. Grad kli as heavy-Tägli gsi aber isch alles guat ganga.

eini vo merera Hängebrugga

Sefton-Massiv

Mittaglichi Tröchnigspausa

Valley hinter dr Hütta

Di zweit Tour isch vo Makarora (65 km nördlich vo Wanaka) los. Au dött hämmer zerscht müasa an Fluss quera, nu isch dä so gross, dases eim dahai nid in Sinn kämt zum dä crossa. ;-) Isch aber alles guat ganga. Nochhär isches 5 Stund durch Wald und Wiese z'Young Valley hintera. Super schön gsi zum laufa. Tag zwei isch dr härtischt Tag gsi. vor Hütta ischs zerscht a Stund bis ans Endi vom Tal und denn me oder weniger grad ufa (900 Höameter). Ufem Pass doba isch aber super schön gsi und a phantastischi Ussicht hämmer gha. Nochem gnüsa ischs aber wieder fascht glich steil 1000 Höameter aba ind Siberia Hut. 5.5 Stund hämmer gha. Dr Michi het vor dera Tour no an neua Schua kauft, well dr alt dura gsi isch. Het sich aber als Fählkauf usagstellt. Hetem di ganz Ziit druckt. So bini am 3. Tag allai zum Crucible Lake. Drei Viartel vom See sind no mit Schnee und Is bedekt gsi. Isch aber trozdem super gsi döt hina. Noch 4 Stund bini wieder bir Hütta gsi. Dr Michi isch scho mir Diane vorus zur Kerin Forks Hut. Vor dr Hütta hemmer dänn wieder an Fluss (Wilkin-River) müassa quera. D'Hütta hämmer wieder amol allai gha. Dr letscht Tag ischs denn "nu" no durchs Wilkin-Valley usa. Noch 6 Stund und wieder Makarora-River crossa hämmers gschafft gha. Dia Tour isch so zimlich di schönscht gsi bis jetzt. Villicht au wells Wetter mol 4 Tag nu guat gsi isch.

kurz vor dr Youg Hut

Ufstieg zum Pass

Mount Aweful

Siberia-Valley

nomol

as Bild fürd Hanni und dr Alex wo kai Ziit me gha händ.

Lake Crucible

So und geschter simmer in Te Anau ako. Hüt werdemer üsers Glück mol im Milford Sound probiara. Druckend üs Duma dasmer guat Wetter händ. Nochhär wird wieder voll witer Trailerat ;-).

Bis bald wieder...

Aktivraisa uf dr Südinsla

Hallo Schwiiz und rescht vor Welt,
nochera guata, sehr windiga Fährafahrt simmer tip top uf dr Südinsla ako. Vergessend aber aifach z'Aprilwetter in dr Schwiiz! Do isches so wechselhaft as isch zum Tail fascht unheimlich. As kann innert ainera Stund also guat und gern 2-3 mol d'Sunna schina und 2-3 mol regna. Isch also wia Lotto spiela wend a mehrtägigi Tour plansch.
Di erscht Tour hämmer im Norda gmacht. Am erschta Tag häts agfanga regna a halb Stund nochdem mr in dr Hütta gsi sind. Dr zweit Tag hämmer mir Moni und dr Adeline in dr Hütta verbrocht. Am dritta isch den super Wetter gsi und miar sind zema uf da Mt. Arthur. Dr Versuach zum zu The Twins laufa hemmer früazitig abbrocha. Insgesammt a recht glungni Tour gsi. Aschlüssend simmer vo da zwai Girls iglada worda. Si wohnend und schaffend binera Familia ir nöchi vo Nelson. Luschtiga Obig gsi und miar händ könna im Garta zelta.
Di zweit Tour hemmer im Nelson Lakes Nationalpark gmacht. Au dött sind di erschta zwei Täg im Wald nid grad di schönscht gsi. D'Königsetappa isch kli windig gsi suss aber guat. AAm Obig hemmer sogar no d'Hütta für üs gha.
Isch also alles zimlich Wetterabhängig do, guat simmer Wasserdicht...

The Tabelland (links im Nebel Mt Arthur)

Mt Arthur Wandertrupp

Isch also nid so warm wias usgseht uf da Photena... und uf da Gröt extrem windig.

Im Hintergrund links eina vo The Twins

Trail zwai ufera Liachtig richtig zweiti Hütta.

Mt Cupola ufem verdammt steila Weg zum Lake Angelus

So gfallts üs zum laufa, steil, steinig und kai oder wenig Lüüt und gaili Landschafta.

Hüttaplausch z'zwaita, huara luschtig gsi

Das isch an Kea, neuseeländischa Mountainpapagai. Luschtiga Koga...

Kann eu also bim beschta Wila kai gnaui Reiseagaba macha. As got aifach in Richtig Süda. Vorussichtlich gits no 5 mehrtägigi Toura. Am Schluss gömmer sicher für 12 Tag ufd Steward Island. Bis bald hoffentlich...