Cancun

Salüüü,

so das isch jetzt di letscht Station gsi in Mexico und ufem amerikanischa Kontinent. Cancun isch recht hässlich. Wenn ma allerdings kli us Cancun usa goht kama ganz cooli und tourischtaarmi Gebiat und Plätzli finda.
Am 23. simmer mitem Schiff ufd Isla Mujeres. Han allerdings kli me erwartet vo dera Insla. Dr Strand im Norda isch wia gmolet mit wissem Sand und türkis Wasser. Dr rescht vor Insla kama aber raucha.
Am 24. hämmer dank üsem super Hostel an Hammer-gaila Usflug gmacht. Miar sind z'zwaita mima Fahrer und dr Bsitzerin vom Hostel am Morga uf Chichen-Itza. D'Maya-Ruina sind huara idrücklich zum aluaga. Schad dases so extrem überloffa isch. Us dem Grund kama au uf kai Gebäude und Tempel me klettera. Z'Klima dött (200 km Nordweschtlich) im Tschungel isch fascht unerträglich gsi. D'Luft hät ma fascht köna verschnida. Isch so rchtig haiss und schwül gsi. Drum hät üs z'Bad in dr Cenote in dr nöchi dopplet freud gmacht. Isch recht speziell in soma riesa Loch dina go bada. Nochdem mr a paar Sprüng ina tua händ ischs ab uf Piste zum Zmittag. Miar sind so richtig typisch mexicanisch go essa. Phantastisch gsi. Mit vollem Maga ischs dänn uf Ek Balam. Dia Ruina händs erscht vor as paar Johr entdeckt. Dementsprechend hets fascht kai Lüt gha. Miar sind üs im Jungel uf und in da Ruina vorko wia zwai klini Indiana Jones uf Ensteckigstour. Hät mr fascht no me Idruck gmacht wia Chichen-Itza. Noch ara Stund umaturna uf alta Tempel simmer no kurz ins Städtli Valladolid. Bis uf di gross Kircha us dr Kolonialziit häts aber nüd z'gseh gä. Noch 11.5 Stund simmer am 8i am Obig wieder im Hostel gsi.

Isla Mujeres

Chichen-Itza

Cenote

Ek Balam

ebafalls Ek Balam. Dia Strohdächer woma gseht sind nu zum abdecke vo wertvollera Sacha, wianer ufem obera Photi gsehnd.

Jo, das ischs also au scho gsi us Mexico. Hät super Spass gmacht zum do raisa.

Morn gots ab uf Auckland, Neuseeland. Miar werdend guati 30 Stund unterwägs si. Und dank dr Ziitverschiabig isch planmässigi Akunft am 27.11., 09:10. Miar freuend üs voll druff zum Kiwi-Country entdecka und beraisa!!!

Bis bald wieder...

San Cristobal de las Casas + Tulum

Hola Amigos,

Noch Oaxaca simmer mitem Bus in guat 12 Stund noch San Cristobal de las Casas. Dia Stadt mit ca. 142'000 Iwohner liet uf 2100 M.ü.M. im Hochland vom Bundesstaat Chiapas. Einigi Lüt händ üs scho empfohla zum döt ana go und as isch sogar no besser gsi als gedacht. San Cristobal isch as super gmüatlichs Städtli. As kunnt aim so richtig kli und beschaulich vor trotz da über hunderttusig Iwohner. Was mr vor allem gnossa händ isch z'agnehma Früaligshafta Klima um dia 20 Grad. Am meischta Spass gmacht häts zum dur di schmala Gässli spaziara und di viela klina, altertümlicha Werkstatta und Lädeli bestuna. Ufem Hauptplatz und in da Hauptstrossa isch maischtens an rega Betrieb gsi.

A typisches Bild vonera Sitagass. Zügt doch irgendwia vo Rua und Gmüatlichkait?!?





Hauptplatz mitara wunderbar farbiga Kircha.

Do lauft no was... Das isch d'Stross mit da maischta klina Lädeli in dr Stadt.

Dia Fraua sind ali sicher högstens 1.60 gross. Waiss au nid wia dia stundalang soviel Tüacher könd heba und umalaufa damit...

Am 18. am Nomittag isches dänn uf di letscht lang Busfahrt in Mexico. 16 Stund spöter simmer hail und recht müad in Tulum ako. Tulum liet an dr Karibik, 120 km vor Cancun. Ds Dorf oder Städtli isch recht hässlich. Was Tulum z'büta hät sind atemberaubendi Stränd, a archeologischi Usgrabigsstätt und "unterirdischi Flusssystem". Nochdem mr üs im Hostel igrichtet händ simmer amol zerscht ab an Strand. Wia im Film, wissa Sand und Palma soweit das Auge reicht. Miar händ üs dänn gschnell entschieda zum go schnorchla. So sind miar zwai mitem Ramon mima klina Schiffli a Stuck usa gfahra und ab ischs ins warma Wasser. Noch ca. 45 Minuta simmer zruck ins Boot und händ dr Standort gwechslet. Am zweita Ort simmer nomol guati 40 Minuta go schnorchla. Isch echt unglaublich di viela knallfarbiga Fischli in da Koralla. Isch kli gsi wia ima Aquarium schwimma. Am zwaita Tag Tulum simmer mima Velo zu da Ruina. Hetends nid dia fantastisch Lag grad am Meer wärends nur halb so fasziniarend. Aber hät a paar guati Bilder gä. Vo dött us simmer ebafalls mim Velo ca. 6 km innland gfahra, wos so unterirdischi Flüss und Wasserlöcher mit Höhlana git. No luschtig gsi zum in sonas Loch ina gumpa. Miar händ au nid schlecht gluagt wos una dina nu so gwimmlet hät vo Fledermüüs. Aber isch as echt erfrischends Bad gsi.

Glasklars und extrem kitschigs Wasser

Ruina in Tulum direkt am Meer

Und morn (21.11.) gots uf di letscht Etappa noch Cancun. Mol luaga wasmer no so triebend. Ligend no so as paar Ideea in dr Luft.

Also iar ghörend...

Oaxaca de Juarez zum zwaita

Hallo zäma,
miar sind fliessig unterwägs gsi in und um Oaxaca. As git also no as paar Bildli zum aluaga:

A Verkäuferi ufem Zocalo

Chapulines, das sind kochti und an dr Sunna trächneti Heuschrecka. A spezialität vo Oaxaca. Hans probiart, schmöckend also gar nid so übel.

Typisches Strossabild

Santo Domingo Kirche usem 16. Johrhundert. Miar sind jo kai Kirchafans aber so öpis wia dia Kircha vo inna hämmer definitiv no nia gseh. Alli Wänd und d'Decki sind voll mit geschnörkel und viiiiiiiieeeel Gold.

Do simmer a Teppich-Weberai go aluaga. Super intressant gsi. D'Wulla färbends mit natürlicha Mittel. z.B. Gelb usera lokala Bluama oder Rot vo Kaktus blüatena. An grossa, ufwendiga Teppich webends dänn vo Hand bis 8 Wucha. Pro Meter ca. ai Wucha.

Das isch kain Wasserfall, sondern Mineraliaablageriga. Gseht aber no luschtig us.

Mezcal-Brauerei. Mezcal wird us grüana Agaven härgstellt (Tequilla us blaua Agaven). Wianer uf däm Bild gsehnd isch recht Staizitlich wias dä Schnaps herstellend. Noch dr kurza Besichtigung häts as usgibigs Degustiara gä. Dr Mezcal wos 8 Johr lagerend isch also echt spitze. In dä wos 8 Monet lagerend tüands a Mottaraupa ina. As schmöcki aifach besser als wema kaini ina täg. Dä Bruch kunnt also nid vom Tequilla!!!

Noch 6 - 10 Johr, nochdem d'Agaven z'erschta und glichzitig letschta mol Blühend sind so gross und könd gerntet werda.

Zuasätzlich simmer no dr Tule-Baum go aluaga. Für sini gschätzta 2000 Johr gsehter also no guat us. Er isch 40 Meter hoch und hät an stattlicha umfang vo 52.58 Meter.

Was mr au no gseh händ sind d'Mixteken Usgrabiga in Mitla. Mitla bedütet soviel wia "Ort des Todes". D'Usgrabiga sind nid grad dr Brüller gsi. Dafür hämmer as paar intressanti gschichtlichi Sacha erfahra.

So das ischs jetzt definitiv gsi vo Oaxaca. D'Nacht verbringemer wieder ima Car und am Morga kömmemer in San Cristobal de las Casas a.

Hasta luego!

Oaxaca de Juarez

Hoi mitanand,
miar sind geschter, 12.11. noch witera 12 Stund Bus-Fahrt hail in Oaxaca de Juarez (usgsprocha übrigens "Ohaka) ako. Das isch d'Hauptstadt vom glichnamiga Bundesstaat. Oaxaca liet uf 1550 M.ü.M. und hät ca. 250'000 Iwohner. Z'Klima isch do z'ganza Johr dura Früaligshaft. Miar gnüssends richtig noch dena haissa Täg an dr Küschta mol bi 20-25 Grad dussa z'si! Oaxaca isch dr erscht Ort in Mexico, wo würklich au so isch, wiama sich Mexico vorstellt. Mit riesa Märkt, wona riesa Betriebsamkait herrscht. D'Strossa sind zum Tail no Pflaschteret und z'ganza Zentrum bestoht us alta Gebäude. Einzelni Kirchena sind sogar no vor Ziit vor erschta Besiedlig vom 16. Johrhundert. Am Obig isch dr Zocalo (Hauptplatz) voll mit Lüt. Si sind am Musig macha, am zualosa, am Tüacher, Klaider und Ramsch verkaufa oder aifach am dura Laufa. Was au nid fehlt sind ainzelni Bettler (vor allem ganz alti Lüt) und Schuahputzer, wo mit irna Wägeli überall ufem Platz stönd. As macht uf all Fäll riesa Spass, so durch dia Märkt und das bunti Triba spaziara.
Mora werdemer dänn no as Usflügli macha. Me dazua und Bilder kömend dänn.
I raicha eu do mol no di versprochna Bilder vo Puerto Vallarta, Acapulco und Puerto Escondido no.

Altstadt vo Puerto Vallarta

zu däm Beach kunnt ma nur per Boot (Vallarta)

In "VW-Käfer Town" Acapulco. Miar händ no nia so viel Käfer umafahra gseh wia in Acapulco.

Beach vo Acapulco

Typische Verkaufsstand an da Hauptstrossa (Photi usem Bus zwüscha Acapulco und Escondido)

Zicatela Beach in Puerto Escondido. An däm hauts noch Hawaii di zwait gröschta Wella vor Welt ina.

Fischerbötli in Escondido

nomol ais

so verkaufends am Strand allerlai Esswara

kai Angscht, do simmer no ainigi Üabigsstunda awäg...

Sunset in Puerto Escondido (und so gsehts jeda Tag us...)

Soviel für da Moment. Nögscht Bricht gits au scho bald wieder!

Puerto Escondido

Hallo,

ein Hoch auf unsre Busfahrer, Busfahrer, Busfahrer...

glatti 66 Stund simmer in da letschta zwai Wucha in Büs (Cars) ghockt. Ok, zwai mol über Nacht so dasmer no händ köna schlofa dina. As funktioniart wunderbar mit däna Büs. D'Fahrer probiarend zwor öfters mol neui Streckarekörd ufzstella. Aber bis jetzt simmer immer no an aim Stuck ako...!

Noch Mazatlan simmer uf Puerto Vallarta. Üsers Hostel isch zmitzt im Altstädtli gsi. Recht gmüatlich gsi. Dr Rescht vo Vallarta isch mit Hotel vollgstopft. Isch aber trotzdem relativ as asprechend Städtli. Ain Tag hämmer an "Schnorchelusflug" gmacht. Gschnorchlet hämmer knappi 40 Minuta. As isch dänn no anen einsama Beach und zuma Wasserfall. Wasserfall isch zwor au kli übertriba gsi. Dä z'Molinis isch minimum dopplet so hoch. Und wells inklusiv gsi isch hämmer no 2,3,4... Biar gno.

Dr Tag druff isch ab uf Acapulco. Hmmm... lohnt sich also echt nid!!! Miar sind froh gsi simmer nu ai Nacht dött gsi. Me Wort muasi gar nid verlüra.

Puerto Escondido hingäga hät sich als grandiosa, fantastisch gmüatlicha Platz entpuppt. Isch an Traum do!!! Super schöni Beaches, gaili Waves zum surfa (morn dänn), a gmüatlichs Städtli, as guats Hostel und jedi mengi Strandbars. Jo so sölls doch si.



Allgemain kli zu da letschta paar Tag und Mexico:

Ds Wetter isch nur super bis jetzt. Jeda Tag so zwüscha 30 und 36 Grad. Ds mexicanischa Essa isch fantastisch und günschtig. Fisch, Tintafisch, Shrimps... sind dr Hammer. Hüt hämmer mol selber Fisch kocht. As Kilo Filet koschtet im Lada guat 5 CHF. Lächerlich. As Biar isch im Lada so ca. 50 Rp. (Corona). Für 4 Banana hämmer hüt öpa 15 Rp. zahlt usw. Und d'Lüt sind au sehr fründlich!



Miar händ in Vallarta no a schweri Entscheidig z'fälla gha. Und zwor ob mr Südamerika oder Neu Seeland weg lönd. Miar händ entschlossa afang Dezember uf Neu Seeland z'flüga.

D'Flüg vo Peru oder Ecuador noch Auckland sind recht tür, dr billigscht woni gfunda han ca. 1600.-. Drzua kämt nomol ca. 400.- für da Flug vo Cancun uf Auckland. Sprich finanztechnisch wär das nid würklich Sinnvoll gsi. What ever...



Was üseri nögscht Destination isch, stoht no in da Sterna. Sicher isch, dasmer üs bis noch Cancun dura schlönd und bis dött sicher 3, 4 oder me Stopps machend.

Cabo San Lucas - Mazatlan

Hola! Qué tal?

Üs gots immer no super. Cabo San Lucas hämmer noch a paar Tag hinter üs loh. Ain Tag simmer no mit Kayaks ufs Meer usa. Schlucht verdammt und zaigt amol so richtig, wia d'Distanza im Wasser trügend. Am Obig simmer uf all Fäll wieder mol so richtig uf dr Schnorra gsi. Dafür hät z kalta Corona umso besser gschmöckt. Miar händ dank am Tip vom Hotel zwai mol fantastisch und voll günschtig Fisch (und anders Meeresgetier) gessa. Zu allem ana hät üs dr Kellner Tequilla vom finschta serviart. Also vergessend dä "Fusel" womer in dr Schwiiz trinkend!!!

Am 31.10. am halb 11i ischs mim Bus zerscht 4 Stund uf Pichilingue (bi La Paz). Vo dött simmer in ca. 16 Stund mir Autofähra noch Mazatlan. Isch no luschtig gsi, miar sind wieder mol di ainziga Touris gsi. Mazatlan isch jetzt nüd grad umwerfends, drum hämmer üs au scho z'nögschta Bus-Ticket organisiart. Ir Nacht vom 2. uf da 3. fahremer uf Puerto Vallarta. Miar werdend also Morn no dr ganz Tag Ziit ha, zum Mazatlan nöcher aluaga. Villicht entdeckemer jo no öpis spannends.

üses Hotel in Cabo San Lucas

mitem Kayak unterwägs

ebafalls

Sunnauntergang uf dr Fähra

Strandbaizli in Mazatlan

Übrigens simmer am 3. November scho glatti 6 Monet unterwägs!!!

!Hasta luego! usem agnehm warma bis verdammt haissa Mexico.