Dienstag, 12. Mai 2009

Tag 4 in Moskau

Dr zweitletsschti Tag in Moskau isch au scho bald wieder verbie. Nochera witera luschtiga Nacht im Papa's Place (ein MUSS für jeda wo mol in Moskau isch...) simmer wieder eher biz spot und licht beduslet im Hostel ako. So gega Mittag simmer dänn ufgstanda und händ amol üsi stinkenda Kleider gwäscha. Z'Zimmer isch jetzt mit da Kleider tapeziart. Miar hoffend mol as tröchnet alles bis morn Nomittag.
Am Mittag simmer ufgstanda bi stralendem Sunnaschii und scho wieder 25 Grad. As hät sich dänn aber um di 3 schlagartig gänderet und jetzt hämmer halt kli Rägawetter. I finds super, isch nämlich in sonera Megacity einiges agnehmer bi jetzt no 15 Grad.
Miar händ dänn nochem erschta Gwitterli doch no an klina Usflug gwogt durd Stadt. Miar sind vom Hostel us in di alti Ikaufs- und Kaffimeila "Stary Arbat". An dera Stross häts dänn au grad no z'Moskauer Hard Rock Cafe gha, hämmer grad schnell müassa ana Biarli.;-)
D'Fotana sind as paar Idrück vo hüt.

D'Turi-Zona "Stary Arbat"

Moskauer Obig Verkehr uf so 4 - 6 Spura pro Strossasita

An sehr speziella Kontrast, alta Wohnblock und a Kirchli oder Moscheeli oder so...
Sodali, das wärs für hüt wieder gsi. Morn am 21:25 fahrt dänn üsera Zug noch Perm. Das sind dänn 1434 Kilometerli und witeri 2 Zitzonena Ostwärts.
PS: wänns irgend öperem agnehmer wär, wenn miar üsi Bricht uf Schriftdütsch verfassa würend söllers doch bitte säga.
Eingestellt von um

6 Kommentare:

  1. Anonym13. Mai 2009 um 01:02

    hey die herre
    ez sender au scho es zitli onterwägs:)
    han mer moskau ergendwie ganz anderscht vorgstellt als uf dene pics:)aber gset cool us:) wie gfallts üch so?
    wönsch üch denn en gueti witerfahrt uf dene paar wenige kilometer(li);) vell fun;)

    Ah jo ond ps: ech persönlech fende dases onbedengt im böndnerdialekt gschrebe MUESS wärde;) schliessli send jo er 2 d blogger ond es hätt nome no halb sovell style wenners änderet:D

    hends guet:)
    guk steffi

    AntwortenLöschen
  2. Guggi13. Mai 2009 um 04:54

    Klappt jo wia am schnüarli bi eu. Schön ds'khöra...glaub han grad d'Strecki für mina nöchschti Trip gfunda! ;-) Tönt allas sehr spannend. gruass Guggi

    AntwortenLöschen
  3. Mirjam13. Mai 2009 um 06:52

    Unbedigt dialekt bibhalta, denn i miar amigs euri stimm derzua vorstella! :-)

    AntwortenLöschen
  4. Mirjam13. Mai 2009 um 06:53

    Das sött eigentli so heiss: denn kann i miar amigs euri stimm derzua vorstella. :-)

    AntwortenLöschen
  5. Mirjam13. Mai 2009 um 06:55

    Jo, also i korrigiers jetzt nit nomol... :-)

    AntwortenLöschen
  6. louis , sabrina, mama , papa ,coco14. Mai 2009 um 12:05

    Hallo iar liaba, wia gots eu mit zugfara?
    essen iar im zug und wenn stigen iar z erschta mol us?
    miar gönd morn an t higa und am wuchaend gnüssen miar dass t mama frei het
    miar hoffen bald wider öpis fu eu z köra
    bis bald und liabi grüass t familia

    AntwortenLöschen

Abonnieren Kommentare zum Post (Atom)