Di letschta 2 Tag Oahu

Hallo,

Hawaii isch jetzt also hinter ues.

Di letschta Taeg haemmer nomol so richtig gnossa. Miar sind mitem Auto dr Rescht vor Insla go erkundschafta. Im Prinzip ischas fascht rings um d Insla super schoen. Am einta Ort haets kli me Luet am andera kli weniger. I find Oahu persoenlich aber eh kli ueberbevoelkert.

Am 26.06. haemmer ues daenn nomol ind Wella traut. Miar sind go Surfbretter miata und sind uf eigni Fuscht ab. Notuerlich immer doett wos no anderi Surfer gha haet. D Wella sind um einiges groesser gsi als zerschta mol. Trotzdem haemmers gschafft zum 2 - 3 mol ufstoh. Isch as super gails gfuehl, wema ufem Wasser mol so richtig Tempo griagt. As haet ues aber au a paar mol mit da Wella ueberworfa. Na ja dann prost...

Do nomol as paar letschti Bilder vo Hawaii:

ganz im Weschta vom North Shore

Moechtegern-Surferboy 1

und Moechtegern-Surferboy 2

(sind halt gstellti Phoetali vo nochem (!!!) surfa)


An Vulkan haemmer au no "schnell" bestiga, am Hawaii Kai

Cooli Ussicht gsi

Am 28.06. am 04:40 simmer in Anchorage, Alaska glandet. Miar sind vo Honolulu zerscht uf d Insla Maui gfloga und vo doett us uf Alaska. Isch alles guat ueber d Rundi ganga, nu schlofa haemmer nid gross koena im Flugzueg. Miar freuend ues jetzt also dopplet, noch 7 Naecht wieder mol imana Bett z schofa. Z Hostel isch au do wieder super und z Wetter uebrigens au (sunnig bi ca. 25 Grad). Miar sind huet no as paar Stund in Anchorage Down Town gsi. Dr Rescht vom Tag simmer am abklaera, wiama was wo und warum kann macha.

Eu allna jetzt an guata Wuchastart!

PS: Miar haend jetzt no 10 Stund Ziitverschiabig.

Around Oahu-Island

Hallo,

miar sind jetzt also mitema Auto (irgend a Nissan-Büchs) am d'Insla unsicher macha.

Di erschti Nacht hämmer no "illegal" imena Beach-Park zeltet. A alti Iheimischi hät üs zwor gseit miar söllend nur zelta au ohni Bewilligung. D'Ranger segendi kais Problem. Isch dänn au würklich keis Problem gsi. Gschloffa hämmer miserabel. As luftet im untera Teil vor Ostküschta wiana Sau (tschuldigung). OK as isch an guata Tescht gsi fürs Zelt aber suss kli müasam. Am 22. simmer dänn zruck noch Honolulu auf der Sucha nach den Camping-Permits (Camping-Bewilligung). Nochdem mr bir Stell fürd Beach-Parks gsi sind und dia nüd me freis gha händ simmer zum Amt fürd State-Parks. Jo genau, as git öpa drei verschidani Ämter für dä Saich. Dia hät dänn no freii Plätz gha. Dänn kunnt aber s'nögschta, immer Mittwuch+Donnstig Nacht darfsch nid Campa. Wiso au immer. Und darfsch pro Monet nur ei mol uf am glicha Platz gsi si. Jo das sind glaub jetzt eba d'USA, Regla für nüd und Bewilligunga für öpis wod schlussendlich 2.5 Dollar pro Nasa und Nacht zahlsch.

Jo nu...! Miar sind dänn zimlich schnell am North Shore gsi. Döt lauft aber im Moment au nid grad dr huffa. Landschaftlich isch Oahu super cool. Ma kann sich di schöna Stränd ussuacha. Und a paar Meter vom Strand isch entweder Jungle oder Vulkan-Berga. Oder notürlich irgend a Siedlig.

Jo do mol so as paar imressiona:

Diamond Head, 10 Minuta vo Honolulu

An däm Beach hämmer z'erschta mol zeltet

(OK fürd Besserwüsser: hinter däm Beach) ;-)

No comment

Welcome to the jungle, Stross an dr Ostküschta

As huara ghänk hänts meischtens scho über da Strossa

Weschtküschta (Windstilleri Sita)

So das wars wieder vor Front. Wia di einta scho mitgriagt händ, verlömmer Hawaii am 27.06. . Richtig, das isch früaner als am Afang geplant. As isch zwor a paradisischi Insla aber für üs z'kli und z'tüür. Und mit nur am Strand umaligga hämmers echt z'langwilig. Jep, drum packemer üsas Rucksäckli und flügend am Samstig uf da Sunntig noch Anchorage (Alaska). Bis dött ana tankemer nomol kräftig Sunna und gnüssend Hawaii.

Bis bald, villicht scho us Alaska...

z'erschta mol ufem Surfbrett

Hello,
miar sind hüt, am legendära 20. Juni 2009 zum erschta mol ufem Surfbrett gstanda. Und i glaub as wird nid z'letschta mol gsi si! As hät so viel Spass gmacht, isch echt super gail gsi!!! Miar händ mitera Gruppa 2 Surflektiona gno. Nochera Halbstund trochaüabiga simmer ab ind Wella. So 10 - 12 mol simmer sicher ufem Brett gstanda und händ Hawaii-Wella gsurft. Super feeling! Streng ischs aber, padeln padeln padeln. Glaub miar werdend super schlofa dia Nacht. Bis uf das, dases mega Spass macht und Suchtpotential hät, häts aber mit Snowboarda nüd gmeinsam. Leider leider häts kei Bilder gä. Sorry. Aber miar kömend das glaub scho no no z'hola.
Mora kömmer as Miatauto go abhola und startend an 16 tägiga Oahu-Insel-Road-Trip. Miar freuend üs scho mega druf. Vilicht machemer jo unterwegs dänn mol a tänzli mitama Hawaii-Röckli (gäll Flu...). :-)
Suss gits nid viel neus, d'Lüt sind super do und über z'Wetter muasi glaub nid viel Wort verlüra. As isch all Tag super schön, au wenns immer Wolka het und Luftet (ohni das wärs zu hot). Z'schönschta isch, dases au ir Nacht nid abküalt. Bin jetzt also echt grad am schwitza mit schriba im Zimmer.

Kann hüt kei Bildli ufalada, miar händ a recht beschissni Verbindig, hans grad öpa 5 mol probiart...

Bis bald

Akunft uf dr Trauminsla

As härzlichs ALOHA an ali,

sodali do währemer jetzt also tatsächlich ako. Unglaublich...! As isch dr Hammer do!!!

Aber jetzt mol vo Afang a. D'Russa händ üs ohni Problem usreisa lo. Dr erscht Flug uf Seoul (oder Incheon) isch nu grad ei Stund und 50 min ganga. Noch dr Akunft hämmer 9 Stund uf dr Aschlussflug gwartet. Zum Glück hät Seoul an riesiga, moderna Flughafa, so isch d'Ziit tip top uma ganga. Am 20:50 Ortszit simmer dänn abgfloga richtig Hawaii. Isch an gmüatlicha Flug vo ca. 8 Stund gsi. Immer no am 17.06. am 10i simmer in Honolulu glandet. Da Amis hämmer dänn kurz üseri Fingerabdrück und a frisches Photi hinterlo und dänn hämmer ohni witeri Kontrolla könna usa. Dr Gepäckkontrolleur hät üs nu kurz agluagt und lächlend verbie gwunka (you're clean). Usem Flughafa usa häts üs dänn mol fascht us da Socka ghaua. Hät zwor "nu" öpa 28 Grad aber glaub d'Luftfüachtigkeit lit do bi öpa 217%. Richtig GAIL, tuat üsera Seel mol so richtig guat!!!

Z'Hostel isch super suber und d'Lüüt sind au easy. Si bütend recht viel Toura, Füariga... a. Hüt isch z.B. "wednesday Waikiki pub tour". Do dörfend zwei Bündner glaub nid fähla! Wird sicher witzig.

I bin überzügt, miar könd eu bald mit an Hufa Bildli no kli niidischer macha. ;-)

Oahu Island bim Landeaflug

Waikiki Beach (miar händ ca. 2 min z'Fuass)

Und no an ali wo wieder kli verwirrt sind weg dr Zit (miar sind übrigens au). Miar sind jetzt 11 Stund hinter eu, sprich wenns bi eu 20:00 isch isch bi üs 09:00.

Bis bald und i kanns immer nonig glauba...

ab an da Waikiki-Beach

Hallöchen,
so dr letschti Tag Russland isch scho bald verbie.
Miar händ hüt mit dr Bsitzeri vom Hostel an Usflug uf di gröscht Insla um Vladivostok gmacht. D'Insla isch nu grad 40 Minuta mir Fähra im Süda vor Stadt. As seg di bekanntischt Insla rings um Vladivostok und erscht sit guat 10 Johr offa für Touris und Iheimischi. Vorhär häts nur Militär druf gha. Miar sind dänn au a Schiffsabwehr- Batterie go aluaga (40 min Fähra, 30 min Bus, 1 h laufa). Isch no cool gsi. An alta Russ wo dött (zmitzt uf dr Insla) wohnt macht Füariga in da Bunker vor Batterie. Isch as riesa Ding. 40 km wit händs mit dera gschossa. 1991 zletschta mol. So hämmer dr letscht, übrigens wieder 10 grädig und bewölkt, Tag guat uma brocht.
Am 17.06. am 13:00 flügemer ab. Nochema 2 stündiga Ufenthallt in Seoul (Südkorea) gots witer uf Honolulu (Hawaii, USA). Akunftszit isch 17.06. um dia 10i am Morga. Es lebe die Zeitverschiebung (Seoul-Hawaii glaub 20 Stund).

eini vo zwei so Batteria

Retour im Hafa vo Vladiwostok

So jetzt müamer aber ab go packa...

Vladivostok

Ende Zugfahra...,

miar sind geschter nochera 14 stündiga Zugfahrt in Vladivostok ako. Jetzt hämmer Russland also durchquert mitem Zug. Aber an wunda Ar... hämmer dänn imfall nia griagt.

Do in Vladivostok hämmer as gmüatlichs Quartiar. Miar sind zwor nid grad im Zentrum aber dafür hämmer z ganza Hostel für üs. Isch no speziell.

Z'Wetter isch nid grad dr Hit aber das isch anschinend normal do um dia Johreszit. As wird glaub erscht so endi Juni besser. As isch bewölkt bi so 10 - 15 Grad. Zwüschetdura regnets wieder mol und het Nebel.

Villicht hämmer üs au wega däm kli verleita lo zum am Mittwuch (17.06.09) uf Honolulu flüga. As git eba kein Direktflug uf Alaska und so hämmer gfunda, wiso nid no kli Sunna und Wärmi danka?!

Jo und jetzt luagemer no wasmer in Vladivostok no so macha kann. As isch no gail, mitem Meer so nöch uf beidna Sita.

Ufem Bahnhof

Vladivostok hät dr gröscht Pazifikhafa vo da Russa

am Strand (ohni Badefeeling)

Chabarovsk

Noch ueber 60 Stund Zugfahrt simmer am 10.06.2009 am obig in Chabarovsk ako.
D Zugfahrt isch im grossa und ganza recht schnell uma ganga. Dank au dr Hilf vo uesna Abteilkamerada Galina und Anatoli. Isch huara luschtig gsi mit dena zwei. D Galina haet zu ues gluagt wiana Hilfsmama. Miar haend z Bett mueassa schoen azia, Flip Flops alegga und so witer. Dr Anatoli isch bi jedem Bahnhof usgstiga und isch irgendwas lockals zum essa go poschta. So simmer daenn no in Gnuss vo Baikal Amul (graeucherata Baikalfisch) und Kjedr (Nuessli) ko. Baides super guat gsi. Und guat isch au no gsi, dasmer grad no as paar Wort russisch glernt haend (aber nu wenig). D Kommunikation isch wia immer mit Haend und Fuess gsi, aber luschtig.
Chabarovsk isch no a gmueatlichi Stadt mit viel Grueanalaga. As isch abiz wia kli San Francisco. D Stadt verlauft ueber drei me oder weniger steili Huegel. Dr Amur (Fluss) isch riesig, echt beidruckend.
Z Wetter isch wia immer bi uesna akuenft gsi, bewoelkt und Rega. Aber as isch agnehmi 20 Grad. Das isch zum D Stadt aluaga grad recht.
Am 13.06.2009 am Obig goemmer witer uf Vladivostok. Doet haemmer daenn einiges zum organisiara.

Michi, Galina, Anatoli, Roman

Unterwaegs mim Zug, ca. 8 Stund vor Chabarovsk

Chabarovsk oder au klein San Francisco


Bis in Vladivostok...

ab uf Chabarovsk

Sosali Rosali,
morn Morga am 20 vor 6i Ortszit verlömmer z'sinkenda Schiff (Irkutsk). Dänn heisst früa ufstoh und ca. 60 Stund Zugfahra richtig Osta. Chabarovsk (600'000 Iwohner) isch dänn fascht an dr Atlantikküschta und nu 30 km vor Chinesischa Grenza weg.
Leider kömmer nid ina Hostel (wells keini git). Müamer halt ina Hotel.
Geschter und hüt hämmer üs im Hostel kocht, zum z'Budget tüf bhallta. Isch tip top gsi und miar sind grad mega satt. Hüt obig werdemer no ins Pub go Formel 1 luaga und das wars dann vo Irkutsk.
No an Tip, für dia wo au mol a Russland Reis planend. Irkutsk hät ma in eim bis zwei Täg gseh. Als Usgangspunkt für Tourena ischs aber super do. Miar sind jetzt dänn viar Tag do und as isch zviel. Do mr aber as super Hostel händ ischs easy, zum mol kli d'Bei bambela lo, jassa, lesa und gwüssi Sacha im Internet abklära.
So eu allna no an gmüatlicha Sunntig und an guata Start in di neu Wucha.

Insel Olchon

Hallo allersits,
miar sind huet nochem Mittag und anara 6 stuendiga, holpriga Ruekfahrt wieder in Irkutsk ako. Uf Olchon isch no blendenda Sunnaschii und warm gsi, do saichts jetzt bi 10 Grad.
Miar haend a super schoeni und erlaebnissrichi Zit gha uf dera Insla (75 km lang + 15 km breit).

Do a kurzi Zaemafassig:

Tag 1:
Akunft in Khuzir, am Hauptort vo dr Insla (1200 vo 1500 Iwohner). Nochema stuendiga Maerschli haemmer daenn an geigneta Platz zum Zelta gfunda. Z Wetter isch bewoelkt und relativ kueal gsi.

Tag 2:
Nochema kurza Kartastudium simmer zruck uf Khuzir gloffa und haend mol fuer 4 Tag Esswara ikauft. Dr Plan isch recht simpel gsi, miar haend wela uf direktischtem Waeg (durch da Wald) and Ostkueschta. So wit so guat. Am Afang isch super gsi, nur a lichti Stigig und lockera Wald. So noch 3 - 4 Stund (mit je ca. 30 kg ufem Puggel!!!) simmer im Dickicht glandet und an Steilhaeng. Guat, umkehra gilt jo nid und so haemmer Todkaputt ama Hang zeltet.

Tag 3:
Sau kalti Nacht gsi und daenn haets tatsach agfanga schneeia (no comment). Jo nu nichts desto trotz simmer witer. Nochera witera Stund uebelstes Dickicht haemmer kei Nerva me gha und haend kehrt. Noch 5 Stund simmer ufema befestigta Waeg zruck zum alta Platz.
Fazit vo Tag 3: lauf uf Olchon nia ohni Waeg durch da Wald!!!

Tag 4:
Ikauf in Khuzir und daenn viiiiiiiel umaligga, jassa, jongliara, haegga...
Z Wetter haet kehrt und as isch super schoen gsi mit ma kalta Wind (Brrrrr...)

Tag 5:
The same...
PS: Zwei Bernerinna sind no per Zuafall ana schwaezli verbie ko.

Tag 6:
Nomol the same aifach ohni Bernerinna. Isch jo au Sunntig gsi. Dr Wind isch no kaelter gsi (suss aber super Wetter).

Tag 7:
Zweita Alauf richtig Ostkuesta. Und glernt haemmer jo und sind da Waeg no. Erschti Etappa Zeltplatz - Khuzir (1 Stund), doett ikaufa, Khuzir - Seeli uf dr Insla (5 Stund). Hammer hammer schoeni Landschaft gsi, aifach u huara heiss isch gsi zum laufa. Und so simmer wieder mol licht agschlaga am See ako, haend koecherlet und no d Sunna gnossa.

Tag 8:
Ab zur Ostkueschta. Noch witera 2 Stund haemmers daenn gschafft (endlich). Super Platz haemmer gha zum Zelta. As sind no 2 Russa doetta gsi und dr eint isch daenn am Obig no kli uebera ko und haet ues 6 selber gfangni Fisch brocht. Miar haend am daenn mit Vodka dankt. 2Tschecha sind no mim Velo verbie ko, si moegendi nuem zruck fahra. Si hegend fuerd Hifahrt 4 Stund gha (???).

Tag 9:
Ufera andera, oepa glich langa Routa haemmer dr Ruekwaeg atretta. Miar sind guat vorwaerts ko und haend noch 4 Stund laufa in dr Steppa zeltet. Doett haets Fluega und Ameisa gha, as isch eim fascht schlecht worda...! Jo nu as isch dafuer di erscht echt warmi Nacht gsi.

Tag 10:
Am 8i simmer scho uf gsi. Noch packa, laufa, Zmorga essa, laufa, in Khuzir ikaufa, laufa simmer am letschta Schlofplaetzli ako (20 min vom Dorf). Miar haend dr ganz Nomittag d Sunna gnossa und uesera Olchon - Trip mitema Biar begossa (Ok as sind 3 gsi).

Tag 11:
05:00 isch Tagwach gsi. Dr Bus isch daenn puenktlich (untuepisch) am 7ni abgfahra. Und eba, in Khuzir haemmer no strahlend blaua Himmel gha und 6 Stund spoeter haets gseicht in Irkutsk. Miar haend notuerlich d Regahuella nid montiart an da Rucksaeck. Jo nu schada haet sich in grenza ghallte. As isch mol no alles ganz.

So das isches so ganz grob gsi.
Dia Insla isch echt dr Hammer. Landschaftlich und vor Natur haer as echts Erlaebnis gsi.
Uesers Material haemmer jetzt alles koenna brucha und i muass saega: TOP!!! Und d Glueksbringer haemmer au oepa koenna brucha, vor allem bim Wetter.
So gnuag gschriba, luagend doch aifach no d pics a...

Khuzir

Beach nordoestlich vo Khuzir (schoener wia an huffa Feriastraend!!!)

Eina vo uesna Camps

gmueatlichs Lagerfuerli

au Gymnastik haemmer au gmacht ;-)

Do no as paar Landschaftlichi Impressiona:

So hoffa iar haend an klina Idruck griagt vo Olchon. Jetzt hoffi goender grad go Googla zum luaga wo daenn das genau isch. ;-)

Bis bald...